കോഴിക്കോട്: അര്‍ധരാത്രി കെ.എസ്.ആര്‍.ടി.സി 'മിന്നല്‍' ബസില്‍ തനിച്ച് യാത്ര ചെയ്ത വിദ്യാര്‍ഥിനിയെ സ്‌റ്റോപ്പില്‍ ഇറക്കാത്ത സംഭവത്തില്‍ വനിതാ കമ്മിഷന്‍ സ്വമേധയാ കേസെടുത്തു.
ഉത്തരവാദികളായ ബസ് ജീവനക്കാര്‍ക്കെതിരേ നടപടി സ്വീകരിക്കാന്‍ ഗതാഗത കമ്മിഷണര്‍ക്കും പൊലിസിനും നിര്‍ദേശം നല്‍കിയതായും കമ്മിഷന്‍ അംഗം എം.എസ് താര പറഞ്ഞു. തികച്ചും മനുഷ്യത്വരഹിതമായ സംഭവമാണിതെന്നു കമ്മിഷന്‍ അഭിപ്രായപ്പെട്ടു. കോട്ടയം പാലായിലെ എന്‍ട്രന്‍സ് കോച്ചിങ് കേന്ദ്രത്തില്‍ നിന്നു നാട്ടിലേക്കു മടങ്ങിയ കോഴിക്കോട് പയ്യോളി സ്വദേശിയായ വിദ്യാര്‍ഥിനിയെ ആണ് കഴിഞ്ഞദിവസം സ്‌റ്റോപ്പില്‍ ഇറക്കാതിരുന്നത്. വിവരമറിഞ്ഞ പൊലിസ് പിന്നീട് ജീപ്പ് റോഡിന് കുറുകെയിട്ട് ബസ് തടയുകയായിരുന്നു. ബാലുശ്ശേരിയില്‍ സ്വകാര്യബസില്‍ ഗര്‍ഭിണിയായ യുവതിക്കു സീറ്റ് നിഷേധിച്ചുവെന്ന പരാതിയിലും കമ്മിഷന്‍ കേസെടുത്തു.