ന്യൂഡല്‍ഹി: ഇന്ത്യയുടെ സാമ്പത്തിക വളര്‍ച്ച നേരായ വഴിയിലെന്ന് ഐ.എം.എഫ്. അടുത്ത സാമ്പത്തിക വര്‍ഷത്തില്‍ ഇന്ത്യയുടെ വളര്‍ച്ചാ നിരക്ക് 7.4 ശതമാനമായി ഉയരുമെന്നാണ് ഐ.എം.എഫ് ഇന്നലെ വ്യക്തമാക്കിയത്.
ലോക സാമ്പത്തിക ഫോറം പുറത്തുവിട്ട പട്ടികയില്‍ വളര്‍ച്ചാ സൂചികയില്‍ ഇന്ത്യയുടെ സ്ഥാനം ചൈനക്കും പാകിസ്താനും ഏറെ പിറകിലെന്ന് സൂചിപ്പിച്ചതിന് തൊട്ടുപിന്നാലെയാണ് ഐ.എം.എഫ് ഇന്ത്യയെ പിന്തുണച്ചുകൊണ്ടുള്ള വിലയിരുത്തല്‍ നടത്തിയത്. ഇന്ത്യയുടെ ആഭ്യന്തര വളര്‍ച്ചാ നിരക്ക് 2017-18ല്‍ 6.7 ശതമാനമായിരിക്കുമെന്നും സ്റ്റാറ്റിസ്റ്റിക്‌സ് ആന്റ് പ്രോഗ്രാം ഇംപ്ലിമെന്റേഷന്‍ മന്ത്രാലയം സൂചിപ്പിച്ചതിനേക്കാള്‍ മെച്ചപ്പെട്ട നിലയാണ് രാജ്യം കൈവരിക്കുകയുമെന്നാണ് ഐ.എം.എഫിന്റെ അവകാശവാദം.
2019-20 സാമ്പത്തിക വര്‍ഷത്തില്‍ ഇന്ത്യയുടെ വളര്‍ച്ച 7.8 ശതമാനമായി ഉയരുമെന്നും ഐ.എം.എഫ് പറയുന്നു. 2017ല്‍ ചൈനയുടെ വളര്‍ച്ച 6.8 ശതമാനമായിരിക്കുമെന്നും വിലയിരുത്തപ്പെടുന്നു. ലോകബാങ്കിന്റെ വിലയിരുത്തലിന്റെ അടിസ്ഥാനത്തില്‍ അടുത്ത സാമ്പത്തിക വര്‍ഷത്തില്‍ 7.3 ശതമാനം വളര്‍ച്ചയായിരിക്കുമെന്നും വിലയിരുത്തുന്നുണ്ട്.