തൃക്കരിപ്പൂര്‍: കൊട്ടാരവും ചിറയും കായലും കാവും കോട്ടയുമൊക്കെ തൊട്ടറിഞ്ഞ് കുട്ടികളുടെ പഠന യാത്ര. സര്‍വശിക്ഷാ അഭിയാന്‍ ഹൊസ്ദുര്‍ഗ് ബി.ആര്‍.സിയുടെ ആഭിമുഖ്യത്തിലാണ് നാട്ടുസ്മൃതികളിലൂടെ പഠനയാത്ര സംഘടിപ്പിച്ചത്. നാടിന്റെ ചരിത്രത്തെക്കുറിച്ച് ആഴത്തിലറിയാനും ചരിത്ര സ്മാരകങ്ങളെയും പാരിസ്ഥിതിക പ്രാധാന്യമുള്ള പ്രദേശങ്ങളെയും പറ്റി മനസിലാക്കാനും അവസരമൊരുക്കിയായിരുന്നു യാത്ര. കവ്വായിക്കായലിലൂടെയുള്ള ബോട്ടുയാത്ര, നീലേശ്വരം രാജകൊട്ടാരം, കോവിലകം ചിറ, ഇടയിലെക്കാട് കാവ്, ബേക്കല്‍ കോട്ട എന്നിവിടങ്ങളില്‍ സന്ദര്‍ശനം നടത്തി.
ഇടയിലെക്കാട് കാവിലെ വാനരക്കൂട്ടവും മനുഷ്യരോടിണക്കമുള്ള അവയുടെ പ്രകൃതവും കുരുന്നുകള്‍ക്ക് കൗതുക കാഴ്ചയായി. അധ്യാപകരായ സി.വി സജീവന്‍, കെ.വി സുധ, കെ.വി ശശികുമാര്‍, കെ.വി ഉമാദേവി നേതൃത്വം നല്‍കി.