സിഡ്‌നി: ആസ്‌ത്രേലിയന്‍ ഉപപ്രധാനമന്ത്രി ബര്‍ണാബി ജോയ്‌സ് രാജിവയ്ക്കണമെന്ന ആവശ്യവുമായി ഭൂരിപക്ഷം ജനങ്ങളും രംഗത്ത്. മുന്‍ മാധ്യമ സെക്രട്ടറിയുമായുള്ള അദ്ദേഹത്തിന്റെ അവിഹിതബന്ധത്തില്‍ പ്രതിഷേധിച്ചാണ് ഉപപ്രധാനമന്ത്രി രാജിവയ്ക്കണമെന്ന ആവശ്യവുമായി ജനം രംഗത്തെത്തിയത്.
ഇന്നലെ നടന്ന വോട്ടിങ്ങിലാണു രാജ്യത്തെ മൂന്നില്‍ രണ്ടു ജനങ്ങളും രാജി ആവശ്യപ്പെട്ടത്. 65 ശതമാനം ആളുകളും ജോയ്‌സ് രാജിവയ്ക്കണമെന്ന ആവശ്യത്തെ അനുകൂലിച്ച് വോട്ട് ചെയ്തു. സിഡ്‌നി ഡെയ്‌ലി ടെലഗ്രാഫ് പത്രത്തിന്റെ ഒന്നാം പേജില്‍ ഗര്‍ഭിണിയായ പ്രസ് സെക്രട്ടറി വിക്കി ക്യാംപിയോണിന്റെ ചിത്രം അച്ചടിച്ചുവന്നതാണു വിവാദത്തിനു പിന്നില്‍.
വിക്കിയുടെ കുട്ടിയുടെ പിതാവ് ജോയ്‌സ് ആണെന്നു മാധ്യമങ്ങള്‍ കണ്ടെത്തുകയായിരുന്നു. ഇതിനെ തുടര്‍ന്ന് മന്ത്രിമാര്‍ കീഴുദ്യോഗസ്ഥരുമായി ലൈംഗികബന്ധത്തില്‍ ഏര്‍പ്പെടുന്നത് പ്രധാനമന്ത്രി മാല്‍ക്കം ടേണ്‍ബുള്‍ നിരോധിച്ചു. എന്നാല്‍ താന്‍ തെറ്റൊന്നും ചെയ്തിട്ടില്ലെന്നായിരുന്നു ബര്‍ണാബിയുടെ നിലപാട്. മുന്‍പ് സ്വവര്‍ഗവിവാഹത്തെ എതിര്‍ത്തു വിവാദത്തിലകപ്പെട്ടയാളാണ് ജോയ്‌സ്.