കോഴിക്കോട്: ചരിത്ര പ്രസിദ്ധമായ കോഴിക്കോട് ഇടിയങ്ങര ശൈഖ് പള്ളിയിലെ 459-ാം അപ്പവാണിഭ നേര്‍ച്ച മാര്‍ച്ച് 23 മുതല്‍ ഏപ്രില്‍ 2 വരെ നടക്കും. ശൈഖ് പള്ളി മഖാം മാനേജ്‌മെന്റ് കമ്മിറ്റി യോഗം ഉറൂസ് പരിപാടികള്‍ക്ക് അന്തിമരൂപം നല്‍കി. മാര്‍ച്ച് 23 വെള്ളിയാഴ് വൈകുന്നേരം 5 മണിക്ക് നടക്കുന്ന അജ്മീര്‍ ഖാജാ അനുസ്മരണം കോഴിക്കോട് വലിയ ഖാസി സയ്യിദ് അബ്ദുല്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്യും. സയ്യിദ് ഹംസ ബാഫഖി തങ്ങള്‍ അധ്യക്ഷനാകും. ശുഐബ് ഹൈതമി വാരാമ്പറ്റ മുഖ്യപ്രഭാഷണം നടത്തും. രാത്രി 8 മണിക്ക് നടക്കുന്ന മൗലിദ് പാരായണത്തിനും ദുആ മജ്‌ലിസിനും പി.എസ്.ഹൈദ്രോസ് മുസ്‌ലിയാര്‍ ചെറുവാളൂര്‍ നേതൃത്വം വഹിക്കും.
മാര്‍ച്ച് 24 മുതല്‍ 28 വരെ രാത്രി 8.30 ന് നടക്കുന്ന മതപ്രഭാഷണ പരമ്പരയില്‍ കെ.പി.മുഹമ്മദലി ദാരിമി ശ്രീകണ്ഠപുരം, സിറാജുദ്ദീന്‍ ദാരിമി കക്കാട്, അല്‍ഹാഫിള് അബൂശമ്മാസ് അലി മൗലവി ഈരാറ്റുപേട്ട, ഇബ്രാഹീം ഖലീല്‍ ഹുദവി കാസര്‍കോട്, അബ്ദുറസാഖ് ദാരിമി അറക്കല്‍ എന്നിവര്‍ സംസാരിക്കും.
മാര്‍ച്ച് 29 വ്യാഴം വൈകുന്നേരം 5 മണിക്ക് നടക്കുന്ന സ്വലാത്ത് വാര്‍ഷിക സംഗമത്തില്‍ അല്‍ഹാഫിള് ശകീര്‍ ഹൈതമി കീച്ചേരി ആമുഖപ്രഭാഷണം നടത്തും. മഗ്‌രിബ് നിസ്‌കാരാനന്തരം നടക്കുന്ന സ്വലാത്ത് മജ്‌ലിസിന് സമസ്ത കേന്ദ്രമുശാവറാംഗം വാവാട് കുഞ്ഞിക്കോയ മുസ്‌ലിയാര്‍ നേതൃത്വം നല്‍കും. തുടര്‍ന്ന് മുസ്തഫ ഹുദവി ആക്കോട് പ്രഭാഷണം നടത്തും.
മാര്‍ച്ച് 30 വെള്ളി രാത്രി 7 മണിക്ക് നടക്കുന്ന മജ്‌ലിസുന്നൂര്‍ ആത്മീയ സംഗമം പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. പി.കെ.പി.അബ്ദുസ്സലാം മുസ്‌ലിയാര്‍ അധ്യക്ഷനാകും. ഹസന്‍ സഖാഫി പൂക്കോട്ടൂര്‍ പ്രഭാഷണം നടത്തും.സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം വഹിക്കും. തുടര്‍ന്ന് 9 മണിക്ക് നടക്കുന്ന റാത്തീബിന് ഒളവണ്ണ അബൂബക്കര്‍ ദാരിമി നേതൃത്വം വഹിക്കും.
മാര്‍ച്ച് 31 ശനി രാവിലെ 9 മണിക്ക് മഖാം അങ്കണത്തില്‍ സമസ്ത കേരള ജംഇയ്യത്തുല്‍ ഉലമ പ്രസിഡണ്ട് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ കൊടി ഉയര്‍ത്തുന്നതോടെ പ്രധാന നേര്‍ച്ചാപരിപാടികള്‍ക്ക് സമാരംഭം കുറിക്കും. തുടര്‍ന്ന് ജാമിഅ ദാറുസ്സലാം പ്രിന്‍സിപ്പല്‍ മൂസക്കുട്ടി ഹസ്രത്തിന്റെ അധ്യക്ഷതയില്‍ നടക്കുന്ന പണ്ഡിതസംഗമം സമസ്ത കേരള ജംഇയ്യത്തുല്‍ ഉലമ ജന.സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. സമസ്ത വിദ്യാഭ്യാസ ബോര്‍ഡ് ജന.സെക്രട്ടറി എം.ടി.അബ്ദുല്ല മുസ്‌ലിയാര്‍ മുഖ്യപ്രഭാഷണം നടത്തും. ഏപ്രില്‍ ഒന്നിന് ഞായറാഴ്ച സിയാറത്തും കൂട്ടപ്രാര്‍ഥനയും നടക്കും.
ഏപ്രില്‍ 2 വ്യാഴാഴ്ച രാവിലെ 11 മണിക്ക് സമസ്ത ട്രഷറര്‍ സി.കെ.എം സ്വാദിഖ് മുസ്‌ലിയാരുടെ അധ്യക്ഷതയില്‍ ചേരുന്ന സമാപന ഖത്തം ദുആ മഹാസംഗമത്തിന് സമസ്ത കേന്ദ്ര മുശാവറാംഗം മാണിയൂര്‍ അഹ്മദ് മുസ്‌ലിയാര്‍ നേതൃത്വം നല്‍കും. കെ.കെ.പി.അബ്ദുല്ല മുസ്‌ലിയാര്‍ പാലത്തുംകര, ബാപ്പു തങ്ങള്‍ തുടങ്ങിയ പണ്ഡിതശ്രേഷ്ഠരും സാദാത്തുക്കളും സൂഫീവര്യന്മാരും പങ്കെടുക്കും.