പെരിയ: ഹോസ്റ്റലില്‍ താമസിക്കുന്നവര്‍ക്കു ഭക്ഷണം നല്‍കുന്നതിനു പുറംകരാര്‍ നല്‍കാനുള്ള അധികൃതരുടെ തീരുമാനത്തില്‍ പ്രതിഷേധിച്ച് കേന്ദ്ര സര്‍വകലാശാലയിലെ വിദ്യാര്‍ഥികള്‍ നിരാഹാര സമരം തുടങ്ങി. സര്‍വകലാശാലയിലുള്ള മൂന്നു ഹോസ്റ്റലുകളിലായി 15 പാചകക്കാര്‍ ഉണ്ട്. ഇവരെ അടുത്ത മാസം 15 മുതല്‍ ഒഴിവാക്കി ഹോസ്റ്റലില്‍ താമസിച്ചു പഠിക്കുന്ന വിദ്യാര്‍ഥികള്‍ക്ക് ഭക്ഷണം നല്‍കുന്നതിനു വേണ്ടി പുറംകരാര്‍ നല്‍കാനാണ് തീരുമാനം.
ഹോസ്റ്റലില്‍ താമസിച്ചു പഠനം നടത്തി വരുന്ന വിദ്യാര്‍ഥികള്‍ ഹോസ്റ്റല്‍ ഫീസിനു പുറമേ മെസ് ഇനത്തിലും പണം അടക്കുന്നുണ്ട്. എന്നാല്‍ പാചകക്കാരെ പിരിച്ചു വിടുന്നതോടെ പുറംകരാര്‍ നല്‍കുമ്പോള്‍ ഓരോ വിദ്യാര്‍ഥിയും പ്രതിമാസം 500 രൂപ അധികമായി നല്‍കണമെന്നാണ് യൂനിവേഴ്‌സിറ്റി അധികൃതര്‍ വിദ്യാര്‍ഥികളോട് ആവശ്യപ്പെട്ടിട്ടുള്ളത്. ഇതേ തുടര്‍ന്നാണ് വിദ്യാര്‍ഥികള്‍ നിരാഹാര സമരം തുടങ്ങിയത്. വെക്കേഷന്‍ അടുത്ത സാഹചര്യത്തില്‍ വിദ്യാര്‍ഥികളെ സമരത്തിലേക്ക് തള്ളിവിട്ട സര്‍വകലാശാല അധികൃതരുടെ നടപടിയില്‍ പൊതുവെ പ്രതിഷേധം ഉയര്‍ന്നിട്ടുണ്ട്.
വിദ്യാര്‍ഥികളായ അര്‍ച്ചന, വിജയ്, സോനു പാപ്പച്ചന്‍,അക്ഷര എസ്. രാജ് എന്നിവരാണ് ഇന്നലെ മുതല്‍ നിരാഹാര സമരം തുടങ്ങിയത്. അധികൃതര്‍ തീരുമാനം പിന്‍വലിക്കുന്നതു വരെ സമരം നടത്തുമെന്നാണ് വിദ്യാര്‍ഥികള്‍ പറയുന്നത്.
സമരം നടത്തുന്ന വിദ്യാര്‍ഥികളെ സി.പി.എം.സംസ്ഥാന സെക്രട്ടറി കോടിയേരി ബാലകൃഷ്ണന്‍, പി. കരുണാകരന്‍ എം.പി എന്നിവര്‍ സന്ദര്‍ശിച്ചു.