ഭാവ്‌നഗര്‍: കുതിരയെ സൂക്ഷിക്കുകയും സവാരി നടത്തിയുമെന്നതിന്റെ പേരില്‍ ഉയര്‍ന്ന ജാതിയില്‍പ്പെട്ടവര്‍ ദലിതനെ കൊന്നു. ഗുജറാത്തില് ഭാവ്‌നഗര്‍ ജില്ലയിലാണ് സംഭവം.

കുറ്റക്കാരെന്നു കരുതുന്ന മൂന്നു പേരെ കസ്റ്റഡിയില്‍ എടുത്തിട്ടുണ്ടെന്ന് പൊലിസ് പറഞ്ഞു. സംഭവത്തേത്തുടര്‍ന്ന് തിംപി ഗ്രാമം സംഘര്‍ഷാവസ്ഥയിലാണ്.

പ്രദീപ് രാത്തോഡ് എന്ന 21 കാരനാണ് 'ജാതിക്കൊല'യ്ക്ക് ഇരയായത്. രണ്ടു മാസം മുന്‍പാണ് പ്രദീപ് കുതിരയെ വാങ്ങിയത്. ഇതേത്തുടര്‍ന്ന് ഗ്രാമത്തിലെ ഉയര്‍ന്ന ജാതിക്കാരില്‍ നിന്ന് പ്രദീപിന് ഭീഷണി നേരിട്ടിരുന്നു. വ്യാഴാഴ്ച രാത്രിയില്‍ പ്രദീപിനെ കൊല്ലപ്പെട്ട നിലയില്‍ കണ്ടെത്തുകയായിരുന്നു.

ഭീഷണിയെത്തുടര്‍ന്ന് പ്രദീപ് കുതിയരെ വില്‍ക്കാന്‍ തുനിഞ്ഞിരുന്നുവെന്നും താനാണ് പിന്തിരിപ്പിച്ചതെന്നും പിതാവ് കാലുഭായ് രാത്തോഡ് പറഞ്ഞു.

കുടുംബത്തിന്റെ ഫാമിലേക്ക് കുതിയുമായി പോയതായിരുന്നു പ്രദീപ്. തിരിച്ചുവന്ന് രാത്രി ഒന്നിച്ച് ഭക്ഷണം കഴിക്കാമെന്നു പറഞ്ഞാണ് പോയത്. എന്നാല്‍ രാത്രി വൈകിയിട്ടും പ്രദീപ് തിരിച്ചെത്തിയില്ല. തുടര്‍ന്ന് ആശങ്കയോടെ അന്വേഷിക്കാന്‍ തുടങ്ങി. പിന്നീട് ഫാമിലേക്കു പോകുന്ന വഴിയില്‍ കൊല്ലപ്പെട്ട നിലയില്‍ കാണുകയായിരുന്നു. സമീപത്തു തന്നെ കുതിരയെയും അടിച്ചു കൊന്നിട്ടിട്ടുണ്ട്- പിതാവ് പറഞ്ഞു.

3000 ജനങ്ങളുള്ള ഗ്രാമത്തില്‍ 10 ശതമാനമാണ് ദലിത് വിഭാഗത്തില്‍പ്പെട്ടവര്‍.