വടകര: ഓര്‍ക്കാട്ടേരി മത്സ്യമാര്‍ക്കറ്റിനു പിറകുവശത്തെ മാലിന്യ നിക്ഷേപകേന്ദ്രത്തില്‍ ഉണക്കമീന്‍ ഉല്‍പാദനം. ഗ്രാമപഞ്ചായത്ത് ആരോഗ്യവിഭാഗം നടത്തിയ പരിശോധനയിലാണ് മാലിന്യത്തിന് സമീപം മത്സ്യം ഉണക്കാനിട്ടിരിക്കുന്നത് കണ്ടെത്തിയത്. ഇവിടെ നിന്നും ഉണക്കുന്ന മത്സ്യമാണ് ഓര്‍ക്കാട്ടേരിയിലെ കടകളില്‍ പാക്കറ്റുകളിലാക്കി വില്‍ക്കുന്നതെന്ന് ആരോഗ്യവിഭാഗം അധികൃതര്‍ പറഞ്ഞു.
വിലയോ ഉല്‍പാദകന്റെ പേരോ രേഖപ്പെടുത്താത്ത ഇത്തരം ഉണക്ക മത്സ്യങ്ങള്‍ കടകളില്‍ നടത്തിയ പരിശോധനയില്‍ കണ്ടെത്തിയതായും ഇവര്‍ പറഞ്ഞു. ഇന്നലെ വൈകിട്ട് മത്സ്യമാര്‍ക്കറ്റിലും പരിസരത്തും നടത്തിയ പരിശോധനയിലാണ് ഇവ കണ്ടെത്തിയത്.
അറവുകേന്ദ്രത്തിന് തൊട്ടടുത്ത് ടൗണിലെ കടകളില്‍ നിന്നും മാലിന്യം തള്ളുന്നതിന് സമീപത്തായാണ് വെറും തറയില്‍ മീന്‍ ഉണക്കാനിട്ടിരുന്നത്. മാലിന്യ കേന്ദ്രമായതിനാല്‍ ഇവിടെ നായ്ക്കളുടെ ശല്ല്യവുമുണ്ട്. ഇവിടെ നിന്നും കണ്ടെത്തിയ മത്സ്യം ആരോഗ്യവകുപ്പ് അധികൃതര്‍ നശിപ്പിച്ചു.
മത്സ്യമാര്‍ക്കറ്റില്‍ നടത്തിയ പരിശോധനയില്‍ വില്‍ക്കാന്‍ വച്ച ആഴ്ചകളോളം പഴക്കമുള്ള സ്രാവും കണ്ടെത്തി. കെ.ടി.കെ ബാലന്‍ എന്നായാളുടെ ഉടമസ്ഥതയിലാണ് മത്സ്യങ്ങളുടെ കച്ചവടം നടക്കുന്നതെന്ന് ഉദ്യോഗസ്ഥര്‍ വ്യക്തമാക്കി. ഇയാള്‍ക്കെതിരേ നടപടിയെടുക്കും.
പരിശോധനക്ക് ഏറാമല പഞ്ചായത്ത് പ്രസിഡന്റ് എം.കെ ഭാസ്‌കരന്‍, ഹെല്‍ത്ത് ഇന്‍സ്‌പെക്ടര്‍ വി.കെ പ്രേമന്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ ബിജു പാലേരി, സുനില്‍കുമാര്‍ നേതൃത്വം നല്‍കി.