സാവോപോളോ: മൊബൈല്‍ ഫോണും പണവും മോഷ്ടിക്കാനെത്തിയയാളെ ഇടിച്ചു പരത്തി ബ്രസീലിയല്‍ മാര്‍ഷ്യ ആര്‍ട്‌സ് താരം പോളിയാന വിയാന.

രണ്ട് ദിവസം മുമ്പാണ് സിനിമയെ വെല്ലുന്ന ഇടി രംഗം അരങ്ങേറിയത്. റിയോ ഡി ജനീറോയില്‍ ടാക്‌സി കാത്തു നില്‍ക്കുന്നതിനിടെയായിരുന്നു മാന്യനെന്ന് തോന്നിക്കുന്നയാള്‍ പോളിയാനയുടെ സമീപത്ത് വന്നിരുന്നത്. പരിസരം കൃത്യമായി നിരീക്ഷിച്ചതിന് ശേഷം സമീപത്തിരുന്നയാള്‍ പോളിയാനയോട് മൊബൈല്‍ ഫോണും പണവും നല്‍കാന്‍ ആവശ്യപ്പെട്ടു. ഇവ നല്‍കിയില്ലെങ്കില്‍ വെടിവച്ച് കൊല്ലുമെന്ന് ഭീഷണിപ്പെടുത്തുകയും ചെയ്തു.

രണ്ട് പ്രാവശ്യം ഇക്കാര്യം ആവര്‍ത്തിച്ചെങ്കിലും പോളിയാന മൊബൈലും പണവും നല്‍കിയില്ല. ഉടനെ തോക്കിനായി അക്രമി പോക്കറ്റില്‍ കൈയിട്ടപ്പോള്‍ പോക്കറ്റിലുള്ളത് ചെറിയ തോക്കാണെന്ന് മനസിലാക്കിയ പോളിയാന അക്രമിയെ ഇടിച്ച് പരത്തുകയായിരുന്നു. ഇടിയേറ്റ് ബോധം നഷ്ടപ്പെട്ട അക്രമിയെ പൊലിസ് അറസ്റ്റ് ചെയ്യുകയും ചെയ്തു. അള്‍ട്ടിമേറ്റ് ഫൈറ്റിങ് ചാംപ്യന്‍ഷിപ്പിലെ ഫൈറ്ററും മാര്‍ഷ്യല്‍ ആര്‍ട്‌സ് താരവുമാണ് പോളിയാന. യു.എഫ്.സി പ്രസിഡഡന്റ് ഡന വൈറ്റ് ഇക്കാര്യം സോഷ്യല്‍ മീഡിയയില്‍ പോസ്റ്റ് ചെയ്തതോടെയാണ് സംഭവം വൈറലായത്. മോഷ്ടാവിന്റെ ചോരയൊലിക്കുന്ന മുഖം സഹിതമായിരുന്നു പോസ്റ്റ്. പങ്കെടുത്ത 12 ഫൈറ്റിങ്ങില്‍ 10 ജയം സ്വന്തമാക്കിയ താരമാണ് 26 കാരിയായ പോളിയാന.