കരുനാഗപ്പള്ളി: തഴവയില്‍ സാമൂഹ്യവിരുദ്ധരുടെ അഴിഞ്ഞാട്ടം. തഴവ ഗേള്‍സ് ഹയര്‍ സെക്കന്‍ഡറി സ്‌കൂള്‍ സാമൂഹ്യ വിരുദ്ധര്‍ അടിച്ചു തകര്‍ത്തു. തഴവ അമ്പലമുക്കിന് സമീപം സ്ഥിതി ചെയ്യുന്ന സ്‌കൂളിലെ അമ്പതോളം വരുന്ന ടാപ്പുകളും സ്‌കൂള്‍ ലാബിലെ ജനാല ചില്ലകളും അടിച്ചു തകര്‍ക്കുകയായിരുന്നു. കഴിഞ്ഞ ദിവസം രാത്രിയായിരുന്നു സംഭവം. സ്‌കൂളിന് സമീപത്തുള്ള ഒരു ക്ഷേത്രത്തില്‍ ഉത്സവം നടക്കുന്നതിനിടെ ഇവിടെ എത്തിയ ഏതെങ്കിലും സാമൂഹ്യ വിരുദ്ധരാകാം ഇതിന് പിന്നിലെന്ന് കരുതുന്നു. കഴിഞ്ഞ വര്‍ഷവും ഇതിന് സമാനമായ നിലയില്‍ സ്‌കൂളിലെ ഉപകരണങ്ങള്‍ നശിപ്പിച്ചിരുന്നു. അന്ന് സ്‌കൂള്‍ അധികൃതര്‍ കരുനാഗപ്പള്ളി പൊലിസ് സ്റ്റേഷനില്‍ നിന്നും പൊലിസ് സംരക്ഷണം ആവശ്യപ്പെട്ട് സമീപിച്ചിരുന്നതാണ്. സ്‌ക്കൂള്‍ അടിച്ച് തകര്‍ത്തതിനെ തുടര്‍ന്ന് പി.റ്റി.എ  പ്രതിഷേധയോഗം ചേരുകയും പൊലിസ് സ്റ്റേഷനില്‍ പരാതി നല്‍കുകയും ചെയ്തു. ഇതോടെ ഇവിടങ്ങളില്‍ രാത്രികാല പെട്രോളിങ് ഏര്‍പ്പെടുത്തണമെന്ന ആവശ്യം ശക്തമായി.