ജിദ്ദ: ഏറെ നാളത്തെ കാത്തിരിപ്പിനൊടുവില്‍ നാളെ മുതല്‍ ജിദ്ദ- കോഴിക്കോട് സെക്ടറില്‍ എയര്‍ ഇന്ത്യയുടെ ജംബോ വിമാന സര്‍വിസ് പുനരാരംഭിക്കും. 2015 ലാണ് എയര്‍ ഇന്ത്യ കോഴിക്കോട് നിന്ന് ജിദ്ദയിലേക്കുള്ള സര്‍വിസ് നിര്‍ത്തിയത്. അതേ സമയം സര്‍വിസ് പുനരാരംഭിക്കുന്നതില്‍ ഏറെ ആഹ്ലാദത്തിലാണ് ജിദ്ദയിലെ പ്രവാസി സമൂഹം.  വ്യവസായിയും ജിദ്ദ നാഷനല്‍ ആശുപത്രി മാനേജിങ് ഡയരക്ടറുമായ വി.പി മുഹമ്മദലി ജിദ്ദയിലെ പ്രവാസികള്‍ക്കായി ഇതോടനുബന്ധിച്ച് സ്‌നേഹവിരുന്നൊരുക്കി. വിമാനത്തിലെ ആദ്യ യാത്രക്കാര്‍, എയര്‍ ഇന്ത്യ ഉദ്യോഗസ്ഥര്‍, സാമൂഹിക സാംസ്‌കാരിക നേതാക്കള്‍, കോഴിക്കോട്ടേക്ക് നേരിട്ടുള്ള വിമാന സര്‍വിസിനായി പരിശ്രമിച്ചവര്‍,  ബിസിനസ് രംഗത്തെ പ്രമുഖര്‍ തുടങ്ങിയവര്‍ സ്‌നേഹവിരുന്നില്‍ സംബന്ധിച്ചു. 

സര്‍വിസ് പുനരാരംഭിക്കാന്‍ സാധിച്ചതില്‍ സന്തോഷമുണ്ടെന്ന് ചടങ്ങില്‍ പങ്കെടുത്ത എയര്‍ ഇന്ത്യ സൗദി വെസ്‌റ്റേണ്‍ റീജ്യനല്‍ മാനേജര്‍ പ്രഭു ചന്ദ്രന്‍ പറഞ്ഞു. ആഴ്ചയില്‍ രണ്ട് സര്‍വിസുള്ളത് നാലായി ഉയര്‍ത്താന്‍ ശ്രമിക്കുമെന്ന്  അദ്ദേഹം കൂട്ടിച്ചേര്‍ത്തു.