കോഴിക്കോട്: അവയവ ദാനം സമൂഹത്തോടുള്ള വലിയ സേവനമാണെന്ന് തൊഴില്‍ വകുപ്പ് മന്ത്രി ടി.പി രാമകൃഷ്ണന്‍. ഇന്ത്യന്‍ ഡെന്റല്‍ അസോസിയേഷനും സദയം ചാരിറ്റബില്‍ ട്രസ്റ്റും സംയുക്തമായി കെ.പി കേശവമേനോന്‍ ഹാളില്‍ സംഘടിപ്പിച്ച അവയവ ദാന കാംപയിന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മരണപ്പെട്ട് സംസ്‌കരിക്കപ്പെടുന്ന ശരീരത്തില്‍ നിന്ന് കുറെയേറെ രോഗികള്‍ക്ക് ജീവിതത്തിലേക്ക് തിരിച്ച് വരാന്‍ സഹായകരമാകുന്ന പ്രവര്‍ത്തനം നടത്തുന്നത് പുണ്യകരമാണ്. ഇത്തരമൊരു കാംപയിന് ഡോക്ടര്‍മാരുടെ സംഘടന തന്നെ മുന്നിട്ടിറങ്ങിയതില്‍ സന്തോഷമുണ്ടെന്നും മന്ത്രി പറഞ്ഞു. ഐ.ഡി.എ മലബാര്‍ ബ്രാഞ്ച് പ്രസിഡന്റ് ഡോ. ബിനു പുരുഷോത്തമന്‍ അധ്യക്ഷനായി. പുരുഷന്‍ കടലുണ്ടി എം. എല്‍.എ, റിജോ, രമേഷ്‌കുമാര്‍, ഡോ. കെ.ആര്‍ ദിനേശ്, ഡോ ഹുസൈന്‍ മണിക്ഫാന്‍, ഡോ. ഗിരീഷ് കുമാര്‍,ഡോ ധന്യ മുരളീധരന്‍ സംസാരിച്ചു. ഡോ. ജയമീന, ഡോ. ഫിറോസ് ക്ലാസെടുത്തു.