കൊല്ലം: സ്വകാര്യ ബസ് ഉടമകളുടെ സംഘടനകൾ നാളെ പണിമുടക്ക് പ്രഖ്യാപിച്ചിരിക്കുന്ന സാഹചര്യത്തിൽ അധിക സർവിസുകൾ നടത്താൻ കെ.എസ്.ആർ.ടി.സി നിർദേശം.യാത്രക്കാരുടെ തിരക്ക് കണക്കിലെടുത്ത് സർവിസുകൾ ക്രമീകരിക്കാൻ എല്ലാ യൂനിറ്റ് അധികാരികൾക്കും ഓപ്പറേഷൻ എക്സിക്യുട്ടീവ് ഡയരക്ടറാണ് നിർദേശം നൽകിയത്. നിലവിൽ യൂനിറ്റുകളിൽ ലഭ്യമാക്കിയിട്ടുള്ള മുഴുവൻ ബസുകളും സർവിസിന് യോഗ്യമാക്കി ഓപറേറ്റ് ചെയ്യണം. 

ആശുപത്രികൾ, എയർപോർട്ടുകൾ, റെയിൽവേ സ്റ്റേഷനുകൾ എന്നിവിടങ്ങളിലേയ്ക്ക് ആവശ്യാനുസരണം സർവിസുകൾ നടത്തണം.യാത്രക്കാരുടെ തിരക്ക് അനുസരിച്ച് അഡിഷണൽ ഷെഡ്യൂളുകളോ , ട്രിപ്പുകളോ ക്രമീകരിക്കാവുന്നതാണ്. ഈ ദിവസം ഓപ്പറേറ്റിങ് വിഭാഗം ജീവനക്കാരുടെ അവധികൾക്ക് നിയന്ത്രണം ഏർപ്പെടുത്തേണ്ടതാണ്. ചുമതലയുള്ള ഉദ്യോഗസ്ഥർ ബസ് പരിശോധന നടത്തി യാത്രക്കാർക്ക് സൗകര്യപ്രദമായ രീതിയിൽ സർവിസ് ക്രമീകരിക്കണം. എന്തെങ്കിലും ക്രമസമാധാന പ്രശ്നങ്ങളുണ്ടാകുന്നതിന് സാധ്യതയുണ്ടെങ്കിൽ കർശന നടപടികൾക്കായി പൊലിസ് സഹായം തേടണം. സർവിസുകൾ നടത്താൻ കെ.എസ്.ആർ.ടി.സി നിർദേശമുണ്ടെങ്കിലും മലബാറിലടക്കം ഇത് എത്രത്തോളം സാധ്യമാകുമെന്ന് കണ്ടറിയണം.