ആറ്റിങ്ങല്‍ : കുറക്കട ഭാവന ജങ്ഷനു സമീപം വിളയില്‍ വീട്ടില്‍ സുധിന്‍ സുന്ദറിനെ മര്‍ദിച്ച് കൊലപ്പെടുത്താന്‍ ശ്രമിച്ച കേസിലെ ഒന്നും രണ്ടും പ്രതികള്‍ അറസ്റ്റില്‍.  മുടപുരം മേലെ തുണ്ടുവിള വീട്ടില്‍ അപ്പു എന്ന അനീഷ്, കുറക്കട അണ്ടൂര്‍ ചരുവിള വീട്ടില്‍ ഉണ്ണി എന്ന അജിത് എന്നിവരാണ് അറസ്റ്റിലായത്. മൂന്നാം പ്രതി ആഷിക് നേരത്തേ പിടിയിലായിരുന്നു. ഡിസംബര്‍ 18നു വൈകിട്ടാണ് കേസിനാസ്പദമായ സംഭവം നടന്നത്.
കുറക്കടയിലേക്ക് സുധിനെ വിളിച്ചുവരുത്തി മൂവരും ചേര്‍ന്ന് മര്‍ദിക്കുകയായിരുന്നു. മര്‍ദനത്തെത്തുടര്‍ന്ന് അവശനായ സുധിനെ പൊലിസ് എത്തിയാണ് ആശുപത്രിയില്‍ എത്തിച്ചത്. കഞ്ചാവിന്റെയും മദ്യത്തിന്റെയും ലഹരിയാണ് പ്രതികള്‍ ഇത് ചെയ്തതെന്ന് പൊലിസ് പറഞ്ഞു.
പ്രതികള്‍ക്കെതിരെ കൊലപാതകം, കൊലപാതകശ്രമം, പിടിച്ചുപറി, വീട് കയറി ആക്രമണം തുടങ്ങി നിരവധി കേസുകള്‍ നിലവിലുണ്ട്.