ചെറുവത്തൂര്‍: പിലിക്കോട് സര്‍വിസ് സഹകരണ ബേങ്ക് കാലിക്കടവ് ശാഖയില്‍ മാനേജര്‍ എം.വി ശരത് ചന്ദ്രന്‍ നടത്തിയ മുക്കുപണ്ട പണയതട്ടിപ്പില്‍ വഞ്ചിക്കപ്പെട്ടതു സുഹൃത്തുക്കളും ബാങ്ക് കലക്ഷന്‍ ഏജന്റുമാരും. ഫെബ്രുവരി, മാര്‍ച്ച് മാസങ്ങളിലായാണ് ലക്ഷങ്ങളുടെ തട്ടിപ്പു നടന്നത്. അവശത കാരണം ബാങ്കിലെത്താന്‍ കഴിയാത്ത ഒരു സ്ത്രീ കുറച്ചു സ്വര്‍ണം പണയം വയ്ക്കുന്നതിനായി തന്നിട്ടുണ്ടെന്നും അവരെ സഹായിക്കാന്‍ നിങ്ങളുടെ പേരില്‍ ഈ സ്വര്‍ണം പണയം വയ്ക്കണം എന്നുമാണ് ഇയാള്‍ എല്ലാവരോടും ആവശ്യപ്പെട്ടത്. മൂന്നു മാസത്തിനകം സ്വര്‍ണം തിരികെ എടുക്കുമെന്നും പറഞ്ഞു.
പൊതുപ്രവര്‍ത്തന രംഗത്ത് സജീവമായ ശരത്ചന്ദ്രനിലുള്ള വിശ്വാസം കണക്കിലെടുത്താണ് എല്ലാവരും അതിനു സമ്മതിച്ചത്. ഇതിനാല്‍, തങ്ങള്‍ വഞ്ചിക്കപ്പെട്ട കാര്യം ഞെട്ടലോടെയാണ് എല്ലാവരും കേട്ടത്. കോണ്‍ഗ്രസ് നീലേശ്വരം ബ്ലോക്ക് ജനറല്‍ സെക്രട്ടറിയാണ് ശരത് ചന്ദ്രന്‍. വിശ്വാസം കാട്ടി തന്നെയും വഞ്ചിച്ചുവെന്നാണ് ബാങ്ക് അപ്രൈസറും പറയുന്നത്.  തട്ടിപ്പ് നടന്ന വാര്‍ത്തയറിഞ്ഞ് വെള്ളിയാഴ്ച രാവിലെ മുതല്‍ ബേങ്കിലേക്ക് നിരവധി ഇടപാടുകാരും നാട്ടുകാരും എത്തിയിരുന്നു. വ്യാഴാഴ്ച നടന്ന പരിശോധനയില്‍ തന്നെ ഏഴോളം തട്ടിപ്പുകള്‍ കണ്ടെത്തിയിരുന്നു. വെള്ളിയാഴ്ച രാവിലെ മുതല്‍ രണ്ടു മേശകളിലായി പണയപ്പണ്ടങ്ങള്‍ ക്രമീകരിച്ചു പരിശോധന നടത്തിയാണ് മുക്കുപണ്ടങ്ങള്‍ കണ്ടെത്തിയത്. സ്വര്‍ണത്തെ വെല്ലുന്ന രീതിയിലാണു മുക്കുപണ്ടങ്ങള്‍ തയാറാക്കിയിരുന്നത്. ഇത്രയും പണ്ടങ്ങള്‍ എവിടെ നിന്നു ലഭിച്ചുവെന്നും കണ്ടെത്തേണ്ടതുണ്ട്. മറ്റാരുടെയെങ്കിലും സഹായം ഇയാള്‍ക്കു ലഭിച്ചിട്ടുണ്ടോ എന്നുള്ളതും പൊലിസ് അന്വേഷണത്തിലൂടെ മാത്രമേ കണ്ടെത്താന്‍ കഴിയൂ. 56 പാക്കറ്റുകളില്‍ മുക്കുപണ്ടങ്ങള്‍ മാത്രമായിരുന്നു. രണ്ടു പാക്കറ്റുകളില്‍ യഥാര്‍ഥ സ്വര്‍ണത്തോടൊപ്പം മുക്കുപണ്ടങ്ങളും കണ്ടെത്തി.
തട്ടിപ്പ് കണ്ടെത്തിയതിനെ തുടര്‍ന്ന് ഇടപാടുകാര്‍ ആശങ്കയിലാണ്. തങ്ങളുടെ പേരില്‍ മറ്റൊരാള്‍ നടത്തിയ തട്ടിപ്പിനെ തുടര്‍ന്നു നിയമനടപടികള്‍ നേരിടേണ്ടി വരുമോ എന്ന ആശങ്കയിലാണ് ശരത് ചന്ദ്രന്റെ വഞ്ചനയ്ക്ക് ഇരയായവര്‍.
അതേസമയം, ചില വ്യക്തികളുടെ പേരില്‍ ബോധപൂര്‍വം പണയം വെച്ച ഉരുപ്പടികളാണ് വ്യാജമെന്ന് കണ്ടെത്തിയിരിക്കുന്നതെന്നും മറ്റു സ്വര്‍ണ ഉരുപ്പടികള്‍ക്കോ ലോക്കറില്‍ വച്ച സ്വര്‍ണത്തിനോ ഡപ്പോസിറ്റ് തുകയ്‌ക്കോ ഒന്നും സംഭവിച്ചിട്ടില്ലെന്നും ഭരണസമിതി അറിയിച്ചു.