തൊടുപുഴ: സംസ്ഥാനത്തെ പ്രതിദിന വൈദ്യുതി ഉപയോഗം വീണ്ടും ഉയര്‍ന്നു. ഇന്നലെ രാവിലെ ഏഴിന് അവസാനിച്ച 24 മണിക്കൂറിലെ വൈദ്യുതി ഉപയോഗം 85.1269 ദശലക്ഷം യൂനിറ്റായിരുന്നു. 

2020 ലെ ഉയര്‍ന്ന ഉപയോഗമാണിത്. ആഭ്യന്തര ഉല്‍പാദനം 21.5733 ദശലക്ഷം യൂനിറ്റായി ഉയര്‍ത്തി.  63.5536 ദശലക്ഷം യൂണിറ്റ് വൈദ്യുതി ഇന്നലെ പുറത്ത് നിന്നെത്തിച്ചു. പുറം വൈദ്യുതിയില്‍ കുറവ് വന്നതിനേത്തുടര്‍ന്ന് സംസ്ഥാനത്ത് വ്യാഴാഴ്ച വൈദ്യുതി നിയന്ത്രണം ഏര്‍പ്പെടുത്തിയിരുന്നു.  ഹരിയാനയിലെ ജിന്‍ഡാല്‍ പവര്‍ ലിമിറ്റഡില്‍ നിന്നും ദീര്‍ഘകാല കരാര്‍ പ്രകാരം ലഭിക്കേണ്ടിയിരുന്ന 340 മെഗാവാട്ട് വൈദ്യുതി, പ്ലാന്റിലെ അപ്രതീക്ഷിത യന്ത്ര തകരാര്‍ മൂലമാണ് കുറവു വന്നത്. കേന്ദ്ര വൈദ്യുതിയിലെ കുറവ് ഇന്നലെ പരിഹരിക്കാനായത് ആശ്വാസമായി. ഇടുക്കി പദ്ധതിയുടെ മൂലമറ്റം പവര്‍ ഹൗസിലെ ഉത്പ്പാദനം 7.256 ദശലക്ഷം യൂനിറ്റായി ഉയര്‍ത്തി. ശബരിഗിരിയില്‍ 4.1163 ദശലക്ഷം യൂനിറ്റും ഇടമലയാറില്‍ 1.2428 ദശലക്ഷം യൂനിറ്റും ഉത്പ്പാദിപ്പിച്ചു. മറ്റ് പദ്ധതികളില്‍ ഒരു ദശലക്ഷം യൂനിറ്റില്‍ താഴെയായിരുന്നു ഉത്പ്പാദനം.  ഇടുക്കി പദ്ധതിയിലേക്കുള്ള നീരൊഴുക്ക് പൂര്‍ണമായും നിലച്ചു. 

സംഭരണ ശേഷിയുടെ 54 ശതമാനം വെള്ളം എല്ലാ സംഭരണികളിലുമായി നിലവിലുണ്ട്. ഇതുപയോഗിച്ച് 2223.952 ദശലക്ഷം യൂനിറ്റ് വൈദ്യുതി ഉത്പാദിപ്പിക്കാനാകും. കഴിഞ്ഞ വര്‍ഷം ഇതേ ദിവസത്തേക്കാള്‍ 201.28 ദശലക്ഷം യൂനിറ്റ് അധികമാണിത്.