ന്യൂഡല്‍ഹി: നീറ്റ് പരീക്ഷയുമായി ബന്ധപ്പെട്ട് ആവര്‍ത്തിച്ചുണ്ടാവുന്ന വീഴ്ച്ചകളില്‍ കേന്ദ്രസര്‍ക്കാരിനെതിരെ രൂക്ഷവിമര്‍ശനവുമായി സുപ്രിംകോടതി. ഇത് ഇങ്ങനെ മുന്നോട്ടുകൊണ്ടുപോകാനാവില്ലെന്ന് വ്യക്തമാക്കിയ കോടതി പരീക്ഷാവിവാദങ്ങളെ അതീവ ഗൗരവത്തോടെയാണ് കാണുന്നതെന്ന് ഓര്‍മിപ്പിച്ചു. ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട ഹരജി പരിഗണിക്കവെ ജസ്റ്റിസുമാരായ പി.എസ് നരസിംഹ, അലോക് അരാദേ എന്നിവരടങ്ങുന്ന ബെഞ്ചിന്റെതാണ് പരാമര്‍ശം. 

പരീക്ഷാ വിവാദങ്ങളിലെ പിഴവുകള്‍ തടയണമെന്നും ഈ വിഷയത്തെ വളരെ സൂക്ഷ്മമായാണ് നിരീക്ഷിക്കുന്നതെന്നും കോടതി അറിയിച്ചു. 

നീറ്റ് പരീക്ഷ കമ്പ്യൂട്ടര്‍ അധിഷ്ഠിതമായി നടത്താന്‍ കഴിയുമോ എന്ന് സുപ്രിംകോടതി ചോദിച്ചു. ഡേറ്റാ ചോര്‍ച്ച ഇല്ലാതെ എങ്ങനെ പരീക്ഷ നടത്താന്‍ കഴിയുമെന്ന് വിശദീകരിക്കണമെന്നും കോടതി കേന്ദ്രത്തോട് ആവശ്യപ്പെട്ടു. 

അതേസമയം, വിദ്യാര്‍ഥികളുടെ പ്രശ്‌നങ്ങള്‍ പരിഹരിക്കാന്‍ സര്‍ക്കാര്‍ മികച്ച നടപടികളാണ് സ്വീകരിക്കുന്നതെന്ന് സോളിസിറ്റര്‍ ജനറല്‍ തുഷാര്‍ മേത്ത കോടതിയെ അറിയിച്ചു. വിഷയത്തില്‍ സമഗ്രമായ വിവരങ്ങള്‍ കോടതിയെ അറിയിക്കാന്‍ കൂടുതല്‍ സമയം വേണമെന്ന് അറിയിച്ചതോടെ കേസ് ജൂലൈ 27 ലേക്ക് മാറ്റി. 

The Supreme Court has strongly criticized the Centre over the NEET question paper leak, observing that the current situation cannot be allowed to continue. The court raised serious concerns over the integrity of the examination process and sought accountability from the authorities, while emphasizing the need to ensure fairness and transparency in national-level entrance examinations.