കൊച്ചി: ഡന്റല്‍ കോളജ് വിദ്യാര്‍ഥി നിതിന്‍ രാജിന്റെ മരണവുമായി ബന്ധപ്പെട്ട കേസില്‍ കോടതിയില്‍ ഹാജരായ അന്വേഷണ ഉദ്യോഗസ്ഥനെ വീണ്ടും രൂക്ഷമായി വിമര്‍ശിച്ച് ഹൈക്കോടതി. സര്‍ക്കാര്‍ ഒന്ന് നാറിക്കോട്ടെ എന്ന ഉദ്ദേശം നിങ്ങള്‍ക്കുണ്ടോയെന്നും ആഭ്യന്തര വകുപ്പിന്റെ ശോഭ ഇല്ലാതാക്കണമെന്ന് ആരെങ്കിലും പറഞ്ഞോയെന്നും കോടതി ചോദിച്ചു. 

ഡോ. റാമിനെ അറസ്റ്റ് ചെയ്തപ്പോള്‍ സുപ്രിംകോടതി അനുശാസിക്കുന്ന തരത്തിലുള്ള ഗ്രൗണ്ട്‌സ് ഓഫ് അറസ്റ്റ് രേഖപ്പെടുത്താതിരുന്നതോടെയാണ് അറസ്റ്റിലായ ദിവസം തന്നെ പ്രതിക്ക് ജാമ്യം ലഭിക്കാനിടയാക്കിയത്. പ്രതി പുറത്തുപോകട്ടെ എന്ന് കരുതി ഡി.വൈ.എസ്.പി മനപൂര്‍വ്വം വീഴ്ച്ച വരുത്തുകയായിരുന്നുവെന്ന് ഹൈക്കോടതി അഭിപ്രായപ്പെട്ടു. നിയമപരമല്ലാത്ത നടപടികളിലൂടെ പ്രതികളെ രക്ഷപ്പെടുത്താന്‍ പൊലിസ് നോക്കിയാല്‍ സാധാരണക്കാരുടെ കാര്യങ്ങള്‍ നോക്കാന്‍ കോടതി ഇടപെടുമെന്നും വ്യക്തമാക്കി. 

ഓപ്പറേഷന്‍ തൂഫാന്‍ ഉള്‍പ്പെടെയുള്ള നല്ല കാര്യങ്ങള്‍ ചെയ്യുന്ന സമയത്ത് ആഭ്യന്തര വകുപ്പിന്റെ ശോഭ കെടുത്താനുള്ള ഉദ്ദേശത്തിലാണോ നിങ്ങളിത് ചെയ്തത്? നിങ്ങള്‍ക്ക് നിയമം അറിയില്ല ? പിന്നെ എങ്ങനെയാണ് ഇത്രയും പ്രധാനപ്പെട്ട കേസില്‍ വീഴ്ച്ച സംഭവിച്ചു? പ്രതിക്ക് സുപ്രിംകോടതി വരെ പോകാന്‍ എന്തിനാണ് അവസരം നല്‍കിയത്?  എന്നിങ്ങനെ ഗുരുതരമായ വിമര്‍ശനങ്ങളാണ് കോടതിയുടെ ഭാഗത്തുനിന്ന് ഉണ്ടായത്. 

ഇനി ആവര്‍ത്തിക്കില്ലെന്ന് ഡി.വൈ.എസ്.പി പറഞ്ഞെങ്കിലും ഗുരുതരമായ തെറ്റാണിതെന്നും സര്‍ക്കാര്‍ നടപടിയെടുത്തില്ലെങ്കില്‍ കോടതി അന്വേഷണത്തിന് ഉത്തരവിടുമെന്നും സര്‍ക്കാര്‍ അഭിഭാഷകനോട് ജസ്റ്റിസ് ബദറുദ്ദീന്‍ വ്യക്തമാക്കി. 

കോടതി നിര്‍ദ്ദേശപ്രകാരമാണ് അന്വേഷണ ഉദ്യോഗസ്ഥനായ സുധീര്‍ കല്ലന്‍ ഇന്ന് കോടതിയില്‍ നേരിട്ട് ഹാജരായത്. 

അന്വേഷണ ഉദ്യോഗസ്ഥനെതിരെ സ്വീകരിച്ച നടപടികള്‍ അറിയിക്കാന്‍ എ.ഡി.ജി.പിയ്ക്ക് നിര്‍ദേശം നല്‍കിയ കോടതി, ഹരജി രണ്ടാഴ്ച്ചയ്ക്ക് ശേഷം പരിഗണിക്കാനായി മാറ്റി.