കല്‍പ്പറ്റ: ബൈപ്പാസിലൂടെ പട്ടാപകല്‍ പുലിയുടേയും കുട്ടികളുടെയും വിഹാരം.
ഇന്നലെ ഉച്ചയക്ക് ശേഷം മൂന്നോടെയാണ് പുലിയും രണ്ട് കുട്ടികളും ഓട്ടോയ്ക്ക് മുന്‍പില്‍ ചാടിയത്. ഡ്രൈവര്‍ പെട്ടെന്ന് വണ്ടി നിര്‍ത്തിയതോടെ മൈലാടി പാറയിലേക്ക് പുലിയും കുട്ടികളും ഓടിക്കയറി. കൈനാട്ടിയില്‍ നിന്നും ബൈപ്പാസിലൂടെ ഓട്ടോയുമായി വരികയായിരുന്ന മുസ്തഫ എന്ന ഓട്ടോ ഡ്രൈവറാണ് പുലിയെ കണ്ടത്. പെട്ടെന്ന് വാഹനം നിര്‍ത്തിയതിനാല്‍ പുലിയുമായി കൂട്ടിയിടി ഒഴിവായി.
നിര്‍മാണത്തിലിരിക്കുന്ന കെട്ടിടത്തില്‍ നിന്നാണ് പുലി ഇറങ്ങിയത്. തുടര്‍ന്ന് പൊലിസും ഫോറസ്റ്റ് അധികൃതരും സ്ഥലത്ത് പരിശോധന നടത്തി. സമീപത്ത് സ്‌കൂള്‍ പ്രവര്‍ത്തിക്കുന്നതിനാല്‍ പുലികളെ കണ്ടത് ആശങ്കയ്ക്ക് കാരണമായി. രണ്ടാഴ്ച്ച മുന്‍പ് കെണി ഒരുക്കി പുലിയെ പിടികുടിയിരുന്നു. ഗൂഡലായി കുന്നിന് സമീപത്തായാണ് പുലിയെ കണ്ടത്. വീണ്ടും പുലിയെ കണ്ടതോടെ നാട്ടുകാരുടെ ആശങ്ക ഇരടിച്ചു. കഴിഞ്ഞ ദിവസം കോടതി പരിസരത്തും പുലി എത്തിയിരുന്നു. തുടര്‍ന്ന് വനം വകുപ്പ് കോടതി പരിസരത്ത് കാമറ സ്ഥാപിച്ചു എന്നാല്‍ പുലിയുടെ ചിത്രം പതിഞ്ഞിരുന്നില്ല.

പുലി ചത്ത സംഭവം: വനം വകുപ്പ്  അന്വേഷണം ആരംഭിച്ചു

പന്തല്ലൂര്‍: പന്തല്ലൂരിനു സമീപം സംശയാസ്പദമായ സാഹചര്യത്തില്‍ പുലി ചത്ത സംഭവത്തില്‍ വനം വകുപ്പ് അന്വേഷണം ആരംഭിച്ചു.
പന്തല്ലൂരിന് സമീപം സിങ്കോണ എസ്റ്റേറ്റിലെ തേയിലത്തോട്ടത്തിലാണ് അഞ്ചുവയസുള്ള പുലിയുടെ ജഡം കണ്ടെത്തിയത്. തുടര്‍ന്ന് വനം വകുപ്പ് അധികൃതരെത്തി പരിശോധന നടത്തി പുലിയുടെ പോസ്റ്റ്‌മോര്‍ട്ടം ചെയ്യാനായി കൊണ്ടുപോയി.
പോസ്റ്റ്‌മോര്‍ട്ടം റിപ്പോര്‍ട്ട് വന്നാലെ പുലി ചാകാനുള്ള കാരണം വ്യക്തമാകുകയൊള്ളുവെന്ന് അധികൃതര്‍ പറഞ്ഞു.