റോസ്റ്റോവ്: യുവേഫ യൂറോപ്പ ലീഗ് പ്രീ ക്വാര്‍ട്ടറിലെ ആദ്യ പാദ പോരാട്ടത്തില്‍ ഇംഗ്ലീഷ് കരുത്തരായ മാഞ്ചസ്റ്റര്‍ യുനൈറ്റഡിനു നിര്‍ണായക സമനില. എവേ പോരാട്ടത്തിലാണു റഷ്യന്‍ ക്ലബ് റോസ്റ്റോവിനെതിരേയാണു മാഞ്ചസ്റ്റര്‍ സമനില സ്വന്തമാക്കിയത്. മിഖിതാര്യന്റെ മികവില്‍ കളിയുടെ 35ാം മിനുട്ടില്‍ ഗോള്‍ നേടി മാഞ്ചസ്റ്റര്‍ മുന്നില്‍ കടന്നെങ്കിലും രണ്ടാം പകുതി തുടങ്ങി 53ാം മിനുട്ടില്‍ ബഖറോവിലൂടെ റോസ്റ്റോവ് സമനില പിടിച്ചു.
പിന്നീട് വല ചലിപ്പിക്കാന്‍ മാഞ്ചസ്റ്റര്‍ യുനൈറ്റഡിനു സാധിച്ചില്ല. ഈ മാസം പതിനേഴിനു സ്വന്തം തട്ടകത്തില്‍ നടക്കുന്ന രണ്ടാം പാദ പോരാട്ടത്തില്‍ ആത്മവിശ്വാസത്തോടെ ഇറങ്ങാന്‍ എവേ ഗോളിന്റെ ആനുകൂല്യം മാഞ്ചസ്റ്ററിനു തുണയാകും.
മറ്റൊരു മത്സരത്തില്‍ ഇറ്റാലിയന്‍ കരുത്തരായ റോമ ഫ്രഞ്ച് ടീം ഒളിംപിക്ക് ലിയോണിനോടു പരാജയമേറ്റു വാങ്ങി. എവേ പോരാട്ടത്തില്‍ 4-2നാണു റോമ തോല്‍വി വഴങ്ങിയത്. അതേസമയം എവേയില്‍ രണ്ടു ഗോള്‍ നേടിയതിന്റെ ആനുകൂല്യം സ്വന്തം തട്ടകത്തില്‍ മുതലാക്കാമെന്ന പ്രതീക്ഷ ഇറ്റാലിയന്‍ ടീമിനുണ്ട്.
മറ്റു മത്സരങ്ങളില്‍ സെല്‍റ്റ വിഗോ 2-1നു ക്രസ്‌നോദറിനേയും ജെങ്ക് 5-2നു ജെന്റിനേയും പരാജയപ്പെടുത്തി. ജര്‍മന്‍ ടീമുകളായ ഷാല്‍ക്കെയും ബൊറൂസിയ മോണ്‍ചെന്‍ഗ്ലെഡ്ബാചും നേര്‍ക്കുനേര്‍ വന്ന പോരാട്ടം 1-1നു സമനിലയില്‍ അവസാനിച്ചു. ബെസിക്റ്റസ്- ഒളിംപ്യാകോസ് പിയറസ് പോരാട്ടവും 1-1നു സമനില. നേരത്തെ ആന്റര്‍ലറ്റ് എവേ പോരാട്ടത്തില്‍ അപോയലിനെ 1-0ത്തിനു കീഴടക്കിയപ്പോള്‍ അയാക്‌സിനെ 2-1നു കോപന്‍ഹവന്‍ അട്ടിമറിച്ചു.