തിരുവനന്തപുരം: ഒത്തുതീര്‍പ്പ് വ്യവസ്ഥകള്‍ പാലിക്കാത്ത സര്‍ക്കാര്‍ നടപടിക്കെതിരേ വീണ്ടും പ്രക്ഷോഭവുമായി രംഗത്തിറങ്ങുമെന്ന മുന്നറിയിപ്പുമായി ഡോക്ടര്‍മാരുടെ സംഘടനയായ കേരള ഗവ. മെഡിക്കല്‍ ഓഫിസേഴ്‌സ് അസോസിയേഷന്‍ രംഗത്തെത്തി.
കഴിഞ്ഞ ഏപ്രിലില്‍ നടത്തിയ അനിശ്ചികാല പണിമുടക്ക് പിന്‍വലിക്കാന്‍ ആരോഗ്യമന്ത്രിയുമായി ചര്‍ച്ച നടത്തി ഉണ്ടാക്കിയ ഒത്തുതീര്‍പ്പു വ്യവസ്ഥകള്‍ പാലിക്കാത്തതില്‍ പ്രതിഷേധിച്ചാണ് വീണ്ടും പ്രക്ഷോഭത്തിന് തയാറെടുക്കുന്നത്. പ്രധാന ഒത്തുതീര്‍പ്പ് വ്യവസ്ഥകളില്‍ ഒന്ന് പോലും സര്‍ക്കാര്‍ ഇത് വരെ പാലിച്ചിട്ടില്ലെന്ന് സംഘടന കുറ്റപ്പെടുത്തി. മെയ് ആദ്യ വാരം മന്ത്രിതല ചര്‍ച്ച നടത്തി വിഷയങ്ങള്‍ പരിഹരിക്കാമെന്നതായിരുന്നു വ്യവസ്ഥ. എന്നാല്‍ കമ്മിറ്റി രൂപീകരണം പോലും നടന്നിട്ടില്ല. ഏപ്രില്‍ മാസത്തില്‍ ജോലി ചെയ്ത 26 ദിവസത്തെ ശമ്പളം തടഞ്ഞു വെച്ചിരിക്കുകയാണ്. ഒത്തു തീര്‍പ്പ് വ്യവസ്ഥകള്‍ സര്‍ക്കാര്‍ തന്നെ ലംഘിച്ച സാഹചര്യത്തില്‍ സംഘടന സര്‍ക്കാരിന് നല്‍കിയ സഹകരണം പിന്‍വലിക്കുകയാണെന്ന് കെ.ജി.എം.ഒ.എ പ്രസിഡന്റ് എ.കെ റഊഫും ജനറല്‍ സെക്രട്ടറി ഡോ. വി. ജിതേഷും പറഞ്ഞു. തുടര്‍പ്രക്ഷോഭ പരിപാടികള്‍ സംബന്ധിച്ച് 13ന് ചേരുന്ന കെ.ജി.എം.ഒ.എ സംസ്ഥാന കമ്മിറ്റി ചര്‍ച്ച ചെയ്യും. ജനങ്ങള്‍ക്ക് ഗുണനിലവാരം ഉള്ള ചികിത്സ കിട്ടാനും സര്‍ക്കാര്‍ ആശുപത്രിയെ ആശ്രയിക്കേണ്ടി വരുന്ന സാധാരണക്കാരനെ രണ്ടാം കിട പൗരനായി കാണുന്ന വിവേചനത്തിന് അറുതി വരുത്താനും ജനങ്ങളുമായി യോജിച്ച പ്രക്ഷോഭങ്ങള്‍ക്ക് കെ.ജി.എം.ഒ.എ നേതൃത്വം കൊടുക്കുമെന്ന് ഭാരവാഹികള്‍ പറഞ്ഞു.