ക്വാലാലംപൂര്‍: വിമാനത്താവളത്തില്‍ രാസായുധ ആക്രമണത്തിന് ഇരയായി കൊല്ലപ്പെട്ടത് കിം ജോങ് നാമാണെന്ന് മലേഷ്യ ഡി.എന്‍.എ പരിശോധനയിലൂടെ സ്ഥിരീകരിച്ചു. ഇതോടെ കൊല്ലപ്പെട്ടത് ഉ. കൊറിയന്‍ ഭരണാധികാരി കിം ജോങ് ഉന്നിന്റെ അര്‍ധ സഹോദരന്‍ നാമാണെന്ന് മലേഷ്യന്‍ ഉപ പ്രധാനമന്ത്രി അറിയിച്ചു.
ഇതാദ്യമായാണ് കൊല്ലപ്പെട്ടത് കിം ജോങ് നാമാണെന്ന് മലേഷ്യ സ്ഥിരീകരിക്കുന്നത്. നാമിന്റെ കുട്ടിയുടെ രക്തസാംപിളാണ് ഡി.എന്‍.എ പരിശോധനാഫലം ഒത്തുനോക്കാന്‍ ഉപയോഗിച്ചതെന്ന് ഉപ പ്രധാനമന്ത്രി അഹ്മദ് സാഹിദ് ഹാമിദി പറഞ്ഞു. പാസ്‌പോര്‍ട്ടില്‍ നാമിന്റെ പേര് കിം ചോള്‍ എന്നായിരുന്നു.
കഴിഞ്ഞ മാസം 13നാണ് ക്വാലാലംപൂര്‍ വിമാനത്താവളത്തില്‍ നാം കൊല്ലപ്പെട്ടത്. കേസുമായി ബന്ധപ്പെട്ട് മലേഷ്യയും ഉത്തര കൊറിയയും തമ്മില്‍ നയതന്ത്ര ബന്ധത്തില്‍ വിള്ളലുണ്ടായിരുന്നു.