ഫറോക്ക്: അര്‍ധരാത്രി ബൈക്കില്‍ ആയുധങ്ങളും പെട്രോളുമായി ചുറ്റിനടന്ന് കൊടികളും ബോര്‍ഡുകളും നശിപ്പിച്ച രണ്ട് ആര്‍.എസ്.എസുകാര്‍ പിടിയില്‍.
വെസ്റ്റ് നല്ലൂര്‍ പെരുംതൊടി വീട്ടില്‍ സുഷനാസ് (28), കരുവന്‍തിരുത്തി വെളുത്തേടത്ത് പി. അതുല്‍ (19) എന്നിവരെയാണ് നാട്ടുകാര്‍ പിടികൂടിയത്. വെസ്റ്റ് നല്ലൂര്‍ അങ്ങാടിയില്‍ ഡി.വൈ.എഫ്.ഐയുടെ കൊടി കത്തിച്ചുകൊണ്ടിരിക്കെ കഴിഞ്ഞ ദിവസം അര്‍ധരാത്രിയിലാണ് ഇവര്‍ പിടിയിലായത്.
അതുല്‍ ഓടി രക്ഷപ്പെട്ടെങ്കിലും ബൈക്ക് ഓടിച്ചിരുന്ന സുഷനാസിനെ സംഭവ സ്ഥലത്തുനിന്ന് പിടികൂടുകയായിരുന്നു. അതുലിനെ ഇന്നലെ ഉച്ചയോടെയാണ് പിടികൂടിയത്. വിശദ പരിശോധനയില്‍ ബൈക്കിന്റെ സീറ്റ് തുറന്നുനോക്കിയപ്പോഴാണ് ഇരുതല മൂര്‍ച്ചയുള്ള പ്രത്യേകതരം കത്തി കണ്ടെടുത്തത്.
ഇവരോടൊപ്പം മറ്റുചിലരും ഉണ്ടായിരുന്നതായി സംശയിക്കുന്നു.
വെസ്റ്റ് നല്ലൂരങ്ങാടിക്കു പുറമെ ആദ്യം ഫറോക്ക് ടൗണിലെ പ്രീതി കോംപ്ലക്‌സിനു മുന്‍പിലും പുറ്റെക്കാട് റോഡിലെ റെയില്‍വേ അടിപ്പാതയ്ക്കടുത്തുമുള്ള കൊടിമരമാണ് കത്തിച്ചത്.
ഒറ്റ രാത്രി തന്നെ നിരവധി സ്ഥലങ്ങളിലെ സി.പി.എമ്മിന്റെയും പോഷക സംഘടനകളുടെയും ബോര്‍ഡുകളും കൊടികളും മിന്നല്‍ വേഗത്തില്‍ നശിപ്പിച്ചതായി കണ്ടെത്തി.
പൊലിസിന്റെ ചോദ്യം ചെയ്യലില്‍ ഫറോക്കിലും പരിസരത്തും കൊടിതോരണങ്ങള്‍ നശിപ്പിച്ചത് തങ്ങളാണെന്നു പ്രതികള്‍ സമ്മതിച്ചു.