കണ്ണൂര്‍: കലക്ടറേറ്റ് അനക്‌സിലെ നാഷനല്‍ ഹൈവേ അസിസ്റ്റന്റ് എന്‍ജിനീയറുടെ ഓഫിസില്‍ നിന്നു മുള്ളന്‍ പന്നിയെ പിടികൂടി. ഇന്നലെ രാവിലെ 10.30ഓടെയാണ് വനം വകുപ്പിന്റെ റാപ്പിഡ് റെസ്‌പോണ്‍സ് ടീം അംഗങ്ങളായ റിയാസ് മാങ്ങാടും മുഫീദും ചേര്‍ന്ന് മുള്ളന്‍പന്നിയെ പിടികൂടിയത്. രാവിലെ ഓഫിസ് തുറക്കാനെത്തിയ ജീവനക്കാരാണ് കലക്ടറേറ്റ് അനക്‌സിലെ ചവിട്ടുപടിക്കു ചുവട്ടിലായി മുള്ളന്‍ പന്നിയെ കണ്ടത്. ജീവനക്കാരുടെ ബഹളം കേട്ടു കുതറിയോടിയ മുള്ളന്‍ പന്നി നാഷനല്‍ ഹൈവേ ബ്ലോക്കിലേക്ക് ഓടിക്കയറുകയായിരുന്നു. മുള്ളന്‍ പന്നിയുടെ മുള്ള് കൊണ്ടു കലക്ടറേറ്റിലെ ജീവനക്കാരനു പരുക്കേറ്റു.
ജീവനക്കാര്‍ ടൗണ്‍ പൊലിസ് സ്റ്റേഷനില്‍ വിവരമറിയിക്കുകയും അവര്‍ വനം വകുപ്പുമായി ബന്ധപ്പെടുകയുമായിരുന്നു. സ്ഥലത്തെത്തിയ വനംവകുപ്പ് അധികൃതര്‍ അര മണിക്കൂര്‍ നേരത്തെ പരിശ്രമത്തിനൊടുവിലാണ് മുള്ളന്‍ പന്നിയെ  പിടികൂടിയത്. പിന്നീട് തളിപ്പറമ്പ് റേഞ്ച് ഓഫിസിലെത്തിച്ച് വൈദ്യ പരിശോധനക്കു വിധേയമാക്കി. പൂര്‍ണ ആരോഗ്യവനായ മുള്ളന്‍പന്നിയെ രാത്രിയോടെ വനത്തില്‍ വിട്ടു.