കാസര്‍കോട്: പഴയ ചൂരിയില്‍ മദ്‌റസാ അധ്യാപകന്‍ കുടക് സ്വദേശി റിയാസ് മുസ്‌ലിയാരുടെ കൊലയെ തുടര്‍ന്ന് ജില്ലയില്‍ പൊലിസ് നടത്തിയ റെയ്ഡില്‍ ആയുധങ്ങള്‍ കണ്ടെത്തി. പെരിയടുക്കയിലെ സ്വകാര്യ വ്യക്തിയുടെ ആളൊഴിഞ്ഞ പറമ്പില്‍ നിന്നാണ് വടിവാള്‍, ഇരുമ്പ് വടി, മരവടി തുടങ്ങിയ ആയുധങ്ങള്‍ പിടികൂടിയത്.
ഈ പ്രദേശങ്ങളില്‍ ആയുധങ്ങള്‍ സൂക്ഷിച്ചിട്ടുണ്ടെന്ന രഹസ്യ വിവരത്തിന്റെ അടിസ്ഥാനത്തില്‍ ഇന്നലെ ഉച്ചയോടെയാണ് കാസര്‍കോട് സി.ഐ അബ്ദുര്‍ റഹീം, എസ്.ഐ അജിത്കുമാര്‍ എന്നിവരുടെ നേതൃത്വത്തിലുള്ള സംഘം പരിശോധന നടത്തിയത്. സി.ആര്‍.പി.സി 102 വകുപ്പ് പ്രകാരം കേസെടുത്ത് അന്വേഷണം ആരംഭിച്ചതായി പൊലിസ് അറിയിച്ചു.
പെരിയടുക്ക കോളനിക്കു സമീപത്ത് സ്വകാര്യ വ്യക്തിയുടെ പറമ്പില്‍ പ്ലാസ്റ്റിക് കവറില്‍ സൂക്ഷിച്ച നിലയിലായിരുന്നു ആയുധങ്ങള്‍ സൂക്ഷിച്ചിരുന്നത്. സംഘര്‍ഷ സാധ്യത കണക്കിലെടുത്ത് ആയുധങ്ങള്‍ കണ്ടെത്തുന്നതിനായി സംശയമുള്ള കേന്ദ്രങ്ങളില്‍ റെയ്ഡ് തുടരുമെന്നും പൊലിസ് പറഞ്ഞു.