വാഷിങ്ടണ്‍: വെടിനിര്‍ത്തല്‍ പ്രാബല്യത്തില്‍ വന്നാല്‍ ഇസ്‌റാഈലിനെതിരായ ആക്രമണം നിര്‍ത്തുമെന്ന് ഹൂതികള്‍. യെമനിലെ ഹൂതികളുടെ വക്താവാണ് ചെങ്കടലില്‍ കപ്പലുകള്‍ക്കെതിരായ ആക്രമണം നിര്‍ത്തുമെന്ന തീരുമാനം വ്യക്തമാക്കിയത്. ഞായറാഴ്ചയാണ് വെടിനിര്‍ത്തല്‍ പ്രാബല്യത്തില്‍ വരുന്നത്.

'ഗസ്സയിലെ അതിക്രമം ഇസ്‌റാഈല്‍ അവസാനിപ്പിക്കുകയും യു.എസും യു.കെയും യെമനെതിരെ നടത്തുന്ന ആക്രമണങ്ങള്‍ നിര്‍ത്തുകയും ചെയ്താല്‍ ഹൂതികള്‍ അവരുടെ ഭാഗത്തു നിന്നുള്ള നീക്കങ്ങളും നിര്‍ത്തും. നാവികസേനക്കും വാണിജ്യകപ്പലുകള്‍ക്കും നേരെയുള്ള ആക്രമണങ്ങള്‍ അവസാനിപ്പിക്കും' സംഘടന വക്താവ് മുഹമ്മദ് അല്‍ ബുകഹെയ്തി അല്‍ ജസീറയോട് വ്യക്തമാക്കി. 

യു.കെയും യു.എസും ഹൂതികളെ ലക്ഷ്യമിട്ട് നിരവധി ആക്രമണങ്ങള്‍ നടത്തിയിരുന്നു. യു.എസ് ഹൂതികള്‍ക്ക് ഉപരോധം ഏര്‍പ്പെടുത്തുകയും ചെയ്തിരുന്നു.

ഹമാസുമായുള്ള വെടിനിര്‍ത്തല്‍ താല്‍കാലികം മാത്രമാണെന്നും അനിവാര്യമെങ്കില്‍ യു.എസിന്റെ സഹായത്തോടെ യുദ്ധം തുടരാന്‍ ഇസ്‌റാഈലിന് അവകാശമുണ്ടെന്നും മുന്നറിയിപ്പുമായി പ്രധാനമന്ത്രി ബിന്യമിന്‍ നെതന്യാഹു രംഗത്തെത്തിയിരുന്നു. വെടിനിര്‍ത്തല്‍ പ്രാബല്യത്തില്‍ വരുന്നതിന് തൊട്ടുമുമ്പായിരുന്നു ഇസ്‌റാഈല്‍ പ്രധാനമന്ത്രിയുടെ ഭീഷണി. ബന്ദികളാക്കപ്പെട്ടവരുടെ പട്ടിക ഇസ്‌റാഈല്‍ കൈമാറിയിട്ടില്ലെന്നും ഇത് കരാര്‍ ലംഘനമാണെന്നും അതൊരിക്കലും വെച്ചുപൊറുപ്പിക്കില്ലെന്നും നെതന്യാഹു എക്‌സില്‍ കുറിച്ചിരുന്നു.

ലബനാനിലും സിറിയയിലും ഇസ്‌റാഈല്‍ നേടിയ സൈനിക വിജയമാണ് ഹമാസിനെ വെടിനിര്‍ത്തലിന് പ്രേരിപ്പിച്ചത്. പശ്ചിമേഷ്യയുടെ മുഖഛായ തന്നെ ഗസ്സ യുദ്ധം മാറ്റിയെന്നും ഏറ്റവും നല്ല വെടിനിര്‍ത്തല്‍ കരാറാണ് നടപ്പാക്കാന്‍ കഴിഞ്ഞതെന്നും ഇസ്‌റാഈല്‍ പ്രധാനമന്ത്രി അവകാശപ്പെട്ടു.

The Houthi group has declared that they will stop their attacks on Israel and commercial vessels in the Red Sea if a ceasefire comes into effect. The ceasefire is set to begin on Sunday, and the group has called for Israel to cease its actions in Gaza, as well as for the U.S. and the U.K. to halt their strikes on Yemen.