പെരുമ്പാവൂര്‍: നാട്ടിന്‍പുറങ്ങളില്‍ നെല്‍ക്കൃഷി വ്യാപകമാകുമ്പോള്‍ ജനകീയാസൂത്രണ പദ്ധതി പ്രകാരമുള്ള സബ്‌സിഡി രണ്ടു പൂപ്പ് കൃഷിക്കു മാത്രമായി നിജപ്പെടുത്തിയത് കര്‍ഷകര്‍ക്കു ബുദ്ധിമുട്ടുണ്ടാക്കുന്നു. മൂന്നു പൂപ്പും കൃഷി ചെയ്യാന്‍ തയാറുള്ള കര്‍ഷകര്‍ സബ്‌സിഡിയില്ലാത്തതിനാല്‍ നിലം തരിശിട്ടിരിക്കുകയാണ്. അതേസമയം രണ്ടു പൂപ്പ് കൃഷിക്ക് സാമ്പത്തിക സഹായം ലഭ്യമായതോടെ വിവിധ സംഘങ്ങള്‍ നെല്‍ക്കൃഷി ചെയ്യാന്‍ താല്‍പര്യവുമായി എത്തിയിട്ടുണ്ട്.
ഹെക്ടറൊന്നിന് 17000 രൂപ വരെയാണ് പഞ്ചായത്തുകള്‍ ജനകീയാസൂത്രണ പദ്ധതി പ്രകാരം നെല്‍ക്കൃഷിക്കു കൃഷിഭവന്‍ വഴി സഹായം നല്‍കുന്നത്. 75 കിലോഗ്രാം വിത്തും ആനുപാതികമായി കക്കയും നല്‍കും. സഹായം രണ്ടു പൂപ്പ് മാത്രമായി നിജപ്പെടുത്തിയത് പുനപരിശോധിക്കണമെന്നാണ് കര്‍ഷകരുടെ ആവശ്യം. മൂന്നു പൂപ്പ് കൃഷിക്കും തുകയനുവദിച്ചാല്‍ കൂടുതല്‍ പേര്‍ കര്‍ഷിക മേഖലയിലേക്കു വരുമെന്നും കര്‍ഷകര്‍ ചൂണ്ടിക്കാട്ടുന്നു. രണ്ടു പൂപ്പിനു മാത്രമാണ് സഹായം നല്‍കുകയെന്ന അറിയിപ്പ് പാടശേഖര സമിതി യോഗങ്ങളിലോ മറ്റു യോഗങ്ങളിലോ അറിയിച്ചിട്ടില്ലെന്ന് ഒരു വിഭാഗം കര്‍ഷകര്‍ പരാതിപ്പെടുന്നു.
മൂന്നാം പൂപ്പ് കൃഷിക്കുള്ള അപേക്ഷകളുമായി എത്തുമ്പോഴാണ് സഹായം ലഭിക്കില്ലെന്നറിയുന്നത്. കൂവപ്പടി, മുടക്കുഴ, രായമംഗലം, വാഴക്കുളം, വെങ്ങോല പഞ്ചായത്തുകളില്‍ തദ്ദേശ സ്ഥാപനങ്ങളുടെ സഹായം ലഭിച്ചതോടെ കൂടുതല്‍ പേര്‍ നെല്‍ക്കൃഷി ചെയ്യാനാരംഭിച്ചിട്ടുണ്ട്. ഇതു തുടരണമെങ്കില്‍ വര്‍ഷം മുഴുവന്‍ പഞ്ചായത്തുകള്‍ സഹായം ലഭ്യമാക്കണം. കൃഷി വകുപ്പ് നേരിട്ട് ഹെക്ടറൊന്നിന് 1500 രൂപ നല്‍കുന്നുണ്ട്. കേന്ദ്ര സഹായമായി 4500 രൂപയും അനുവദിക്കാറുണ്ട്. എന്നാല്‍ എല്ലാ വര്‍ഷവും ഈ തുക അനുവദിച്ചതായി അറിയിപ്പുണ്ടാകുന്നതല്ലാതെ തങ്ങള്‍ക്ക് ലഭിക്കാറില്ല എന്നാണ് കര്‍ഷകര്‍ പറയുന്നത്.