ദോഹ: ലോകത്തിലെ ഏറ്റവും വലിയ ദ്രവീകൃത പ്രകൃതി വാതക (LNG) കേന്ദ്രങ്ങളിലൊന്നായ ഖത്തറിലെ റാസ് ലഫാൻ ഇൻഡസ്ട്രിയൽ സിറ്റിയിലുണ്ടായ സ്ഫോടനത്തിൽ 13 പേർ മരിച്ചു. മരിച്ചവരിൽ ഇന്ത്യക്കാരും പാകിസ്ഥാനികളും ഉൾപ്പെടുന്നു എന്നാണ് പ്രാഥമിക വിവരങ്ങൾ. സ്ഫോടനത്തിൽ വിവിധ രാജ്യക്കാരായ 66 പേർക്ക് പരുക്കേറ്റിട്ടുണ്ട്. സംഭവത്തിൽ ഖത്തർ എനർജി ഉന്നതതല അന്വേഷണം പ്രഖ്യാപിച്ചു.

ഞായറാഴ്ച വൈകുന്നേരം ബർസാനിലെ ആഭ്യന്തര വാതക വിതരണ കേന്ദ്രത്തിന്റെ പ്രവർത്തനം പുനരാരംഭിക്കുന്നതിനിടെയാണ് അപകടമുണ്ടായതെന്ന് ഔദ്യോഗിക വൃത്തങ്ങൾ അറിയിച്ചു. സാങ്കേതിക തകരാറാണ് സ്ഫോടനത്തിന് കാരണമായതെന്നാണ് ആഭ്യന്തര മന്ത്രാലയത്തിന്റെ പ്രാഥമിക വിലയിരുത്തൽ.

അപകടം നടന്നയുടൻ തന്നെ അടിയന്തര പ്രതികരണ സംഘങ്ങളെയും അഗ്നിശമന സേനയെയും സംഭവസ്ഥലത്ത് വിന്യസിക്കുകയും തീ പൂർണ്ണമായും നിയന്ത്രണവിധേയമാക്കുകയും ചെയ്തു. പരുക്കേറ്റവരിൽ ഖത്തർ, ഇന്ത്യ, പാകിസ്ഥാൻ, ബംഗ്ലാദേശ്, നേപ്പാൾ, ടാൻസാനിയ, ഗിനിയ, കെനിയ, നൈജീരിയ എന്നീ രാജ്യങ്ങളിൽ നിന്നുള്ള തൊഴിലാളികൾ ഉൾപ്പെടുന്നു. നിലവിൽ ആരുടെയും പരുക്ക് ജീവന് ഭീഷണിയല്ലെന്നാണ് റിപ്പോർട്ടുകൾ സൂചിപ്പിക്കുന്നത്.

എൽഎൻജി കയറ്റുമതിയെ ബാധിച്ചിട്ടില്ലെന്ന് ഖത്തർ എനർജി

ഖത്തറിന്റെ ഊർജ്ജ വ്യവസായത്തിന്റെ ഹൃദയഭാഗമായ റാസ് ലഫാനിലുണ്ടായ അപകടം ആഗോള വാതക വിപണിയെ ബാധിക്കില്ലെന്ന് ഖത്തർ എനർജി വ്യക്തമാക്കി. സ്ഫോടനം രാജ്യത്തിന്റെ എൽഎൻജി കയറ്റുമതി പ്രവർത്തനങ്ങളെയോ തുറമുഖ അടിസ്ഥാന സൗകര്യങ്ങളെയോ ഒട്ടും ബാധിച്ചിട്ടില്ല. ഗ്യാസ് പ്ലാന്റുകളും റാസ് ലഫാൻ തുറമുഖവും നിലവിൽ സാധാരണ നിലയിൽ തന്നെയാണ് പ്രവർത്തിക്കുന്നത്.

ആഗോള വിപണിയിലേക്കുള്ള വാതക വിതരണം തടസ്സമില്ലാതെ തുടരുമെന്ന് കമ്പനി ഉറപ്പുനൽകി. സ്ഫോടനത്തിലേക്ക് നയിച്ച യഥാർത്ഥ സാഹചര്യങ്ങൾ കൃത്യമായി കണ്ടെത്താൻ ലക്ഷ്യമിട്ടുള്ള വിശദമായ സാങ്കേതിക അന്വേഷണം പുരോഗമിക്കുകയാണെന്ന് അധികൃതർ കൂട്ടിച്ചേർത്തു.

ALSO READ: ഖത്തറിലെ റാസ് ലഫാൻ വ്യവസായ മേഖലയിലെ ഫാക്ടറിയിൽ വൻ സ്ഫോടനം; ആർക്കും പരിക്കില്ല

A deadly explosion at Qatar's Ras Laffan gas plant killed 13 people, including Indian nationals, and injured 66 others, raising concerns over industrial safety and emergency preparedness.