ഏറ്റുമാനൂര്‍: കെവിന്‍ കൊലക്കേസിലെ മുഖ്യപ്രതിയുടെ ബന്ധുവാണ് സ്ഥലംമാറ്റപ്പെട്ട കോട്ടയം മുന്‍ എസ്.പി മുഹമ്മദ് റഫീഖ് എന്ന് എ.എസ്.ഐയുടെ അഭിഭാഷകന്‍. കേസില്‍ അറസ്റ്റിലായ എ.എസ്.ഐ പി.എം ബിജു, ഡ്രൈവര്‍ അജയകുമാര്‍ എന്നിവര്‍ക്കായി ഹാജരായ അഭിഭാഷകന്‍ കെ.എസ് സന്തോഷ് കുമാറാണ് ഏറ്റുമാനൂര്‍ ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് മുന്‍പാകെ ഇക്കാര്യം വ്യക്തമാക്കിയത്.
ബിജുവിനും അജയകുമാറിനും വേണ്ടി ഇന്നലെ ജാമ്യാപേക്ഷ നല്‍കവെയാണ് മുഹമ്മദ് റഫീഖ് മുഖ്യപ്രതി സാനു ചാക്കോയുടെ മാതാവ് രഹ്നയുടെ ബന്ധുവാണെന്ന് അഭിഭാഷകന്‍ കോടതിയില്‍ പറഞ്ഞത്.
കെവിനെ തട്ടിക്കൊണ്ടുപോകാന്‍ എത്തിയ സാനു ചാക്കോയുടെയും സംഘത്തിന്റെയും പക്കല്‍നിന്ന് പട്രോളിങ് സംഘത്തിലെ എ.എസ്.ഐ ബിജു 2,000 രൂപ കൈക്കൂലി വാങ്ങിയെന്ന് അന്വേഷണസംഘം കണ്ടെത്തിയിരുന്നു. ഇതേതുടര്‍ന്നാണ് ബിജുവിനെയും അജയകുമാറിനെയും അറസ്റ്റ് ചെയ്തത്. പ്രതികളില്‍നിന്ന് കൈക്കൂലി വാങ്ങിയത് അറിഞ്ഞ ഡിവൈ.എസ്.പി ഗിരീഷ് പി. സാരഥി ഗാന്ധിനഗര്‍ പൊലിസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തിലായിരുന്നു അറസ്റ്റ്.
ബൈജുവിനെയും അജയകുമാറിനെയും ഇന്നലെ കോടതിയില്‍ ഹാജരാക്കിയപ്പോഴാണ് ജാമ്യാപേക്ഷയിന്‍മേലുള്ള വാദത്തില്‍ അഭിഭാഷകന്‍ മുന്‍ എസ്.പിക്കെതിരെ ആരോപണമുന്നയിച്ചത്. ഇവരെ കേസില്‍ കുടുക്കുകയും കേസില്‍ പങ്കുള്ള ഉന്നതോദ്യോഗസ്ഥരെ സ്ഥലംമാറ്റുകയും ചെയ്യുകയാണുണ്ടായതെന്ന് അഭിഭാഷകന്‍ കോടതിയില്‍ വാദിച്ചു. തുടര്‍ന്ന് ഇരുവരെയും ജുഡിഷ്യല്‍ കസ്റ്റഡിയില്‍വിട്ട കോടതി ജാമ്യാപേക്ഷ പരിഗണിക്കുന്നത് ശനിയാഴ്ചത്തേക്ക് മാറ്റി.