തിരുവനന്തപുരം: എ.കെ.ശശീന്ദ്രനെ വീഴ്ത്തിയ ഫോണ്‍ വിവാദം പൊലിസിന്റെ പ്രത്യേക സംഘം അന്വേഷിക്കും. ഐ.ജി ദിനേന്ദ്ര കശ്യപിനാണ് അന്വേഷണ ചുമതല. കോട്ടയം, പാലക്കാട് ജില്ലാ പൊലിസ് മേധാവികളേയും അന്വേഷണ സംഘത്തില്‍ ഉള്‍പ്പെടുത്തിയിട്ടുണ്ട്. ഡി.ജിപിക്കു ലഭിച്ച പരാതികളില്‍ രണ്ടു കേസുകള്‍ രജിസ്റ്റര്‍ ചെയ്യും.

എന്നാല്‍ വിഷയത്തില്‍ ഖേദം പ്രകടിപ്പിച്ച് വാര്‍ത്ത പുറത്തുവിട്ട മംഗളം ചാനല്‍ രംഗത്തെത്തി. തങ്ങള്‍ നടത്തിയത് പെണ്‍കെണിയാണെന്നു ചാനല്‍ സമ്മതിച്ചു. ശശീന്ദ്രനെ വിളിച്ചത് വീട്ടമ്മയല്ല, മാധ്യമപ്രവര്‍ത്തക തന്നെയെന്നും ചാനല്‍ സിഇഒ ആര്‍. അജിത് കുമാര്‍ വ്യക്തമാക്കി.

ഇനി ഇത്തരം തെറ്റുകള്‍ ആവര്‍ത്തിക്കില്ലെന്നും പ്രേക്ഷകരോടും കേരള സമൂഹത്തോടും മാപ്പുപറയുന്നതായും സിഇഒ പറഞ്ഞു. മംഗളം ചാനലിലൂടെ തന്നെയാണ് ഖേദപ്രകടനവും നടത്തിയത്. എട്ടംഗ ടീമാണ് മന്ത്രിയെ കുടുക്കുന്ന ദൗത്യത്തിന് ഇറങ്ങിയതെന്നും മാധ്യമപ്രവര്‍ത്തക സ്വന്തം ഇഷ്ടപ്രകാരമാണ് കെണിയൊരുക്കിയെന്നതും അജിത് വ്യക്തമാക്കി.