പത്തനംതിട്ട: കോന്നി പയ്യനാമണ്‍ ചെങ്കുളത്ത് പാറമടയിലെത്തിയ ഹിറ്റാച്ചിക്ക് മുകളില്‍ കൂറ്റന്‍ പാറ വീണ അപകടത്തില്‍ ശേഷിക്കുന്ന ഒരാള്‍ക്കായി തിരച്ചില്‍ പുനഃരാരംഭിച്ചു. ബീഹാര്‍ സ്വദേശി അജയ് റാവുവിനെയാണ് ഇനി കണ്ടെത്താനുള്ളത്.  ഫയര്‍ഫോഴ്സ് സംഘത്തിന് പുറമേ 27 അംഗ എന്‍.ഡി.ആര്‍.എഫ് സംഘവും രക്ഷാദൗത്യത്തില്‍ പങ്കുചേര്‍ന്നിട്ടുണ്ട്.

ഇന്നലെ ഉച്ചക്കാണ് അപകടം നടന്നത്. പാറകള്‍ ഹിറ്റാച്ചി ഉപയോഗിച്ച് നീക്കം ചെയ്യുമ്പോള്‍ വലിയ പാറക്കഷ്ണങ്ങള്‍ ഹിറ്റാച്ചിക്ക് മുകളിലേക്ക് വീഴുകയായിരുന്നു. ഉച്ചഭക്ഷണത്തിന് ശേഷം ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തില്‍പ്പെട്ടത്. പാറമടയുടെ ദുര്‍ഘടമായ ഭൂപ്രദേശം രക്ഷാപ്രവര്‍ത്തനത്തിന് വലിയ വെല്ലുവിളിയായി.  പാറമടയില്‍ മുകളില്‍ നിന്ന് കല്ലുകള്‍ അടര്‍ന്നു വീഴുന്നത് രക്ഷാപ്രവര്‍ത്തനത്തെ സങ്കീര്‍ണമാക്കി. ദുഷ്‌കരമായതിനെ തുടര്‍ന്നാണ് രാത്രി രക്ഷാപ്രവര്‍ത്തനം നിര്‍ത്തി വെച്ചത്. രക്ഷാപ്രവര്‍ത്തനത്തിനിടയിലും പാറ കഷ്ണങ്ങള്‍ വീണിരുന്നു. ഇതോടെയാണ് രാത്രി രക്ഷാപ്രവര്‍ത്തനം നിര്‍ത്തിവെച്ചത്.

ALSO READ: സ്വകാര്യ ബസ് സമരം തുടങ്ങി, ദേശീയ പണിമുടക്ക് അര്‍ധ രാത്രി മുതല്‍; സംസ്ഥാനത്ത് ഇന്നും നാളെയും ജനജീവിതം സ്തംഭിക്കും 

ഒരാളുടെ മൃതദേഹം ഇന്നലെ കണ്ടെത്തിയിരുന്നു.  ഒഡീഷ സ്വദേശി മഹാദേവിന്റെ മൃതദേഹമാണ് ഇന്നലെ കണ്ടെത്തിയത്. മറ്റ് തൊഴിലാളികളും കുടുങ്ങിയിട്ടുണ്ടോ എന്ന് പരിശോധന തുടരുന്നതിനിടെയാണ് ഒരാളുടെ മൃതദേഹം കണ്ടെത്തിയത്. 

120 ഏക്കര്‍ വിസ്തൃതിയില്‍ പ്രവര്‍ത്തിക്കുന്ന ഈ പാറമടയ്‌ക്കെതിരെ നേരത്തെ പരാതികള്‍ ഉയര്‍ന്നിരുന്നു. പാറമടയിലെ ക്രഷറിന്റെ ലൈസന്‍സ് കഴിഞ്ഞ ജൂണ്‍ 30-ന് അവസാനിച്ചതാണ്. കോന്നി പഞ്ചായത്തില്‍ മുന്‍ അംഗം ബിജി കെ. വര്‍ഗീസ് പാറമടയ്‌ക്കെതിരെ പരാതി നല്‍കിയിരുന്നതായി വിവരമുണ്ട്. സംഭവത്തില്‍ കലക്ടര്‍ അന്വേഷണം നടത്തും.

ALSO READ: പത്തനംതിട്ട പാറമട അപകടം: ഒരാളുടെ മൃതദേഹം കണ്ടെത്തി, മറ്റൊരാൾക്കായുള്ള തിരച്ചിൽ തുടരുന്നു; രക്ഷാപ്രവർത്തനം ദുഷ്കരം

Rescue operations are still underway after the tragic quarry accident in Pathanamthitta. Authorities continue their efforts to locate the remaining missing person amidst debris and challenging conditions.