മസ്‌കത്ത്: ഗള്‍ഫ് സഹകരണ കൗണ്‍സില്‍ (ജിസിസി) രാജ്യങ്ങളില്‍ ഏറ്റവും കുറവ് ജീവിതച്ചെലവുള്ള രാജ്യമായി ഒമാന്‍ തെരഞ്ഞെടുക്കപ്പെട്ടതായി ഡാറ്റാ പ്ലാറ്റ്‌ഫോമായ നംബിയോയുടെ 2025ലെ ജീവിതച്ചെലവ് സൂചിക (Cost of Living Index) വ്യക്തമാക്കുന്നു. കുറഞ്ഞ ജീവിതച്ചെലവും വാടകയും മറ്റ് ജിസിസി രാജ്യങ്ങളില്‍ നിന്നും ഒമാനെ വേറിട്ടുനിര്‍ത്തുന്നു.

ALSO READ: മസ്‌കത്ത്-കോഴിക്കോട് സര്‍വീസുകള്‍ റദ്ദാക്കി സലാം എയര്‍; നിര്‍ത്തിവെച്ചത് ഇന്നു മുതല്‍ ജൂലൈ 13 വരെയുള്ള സര്‍വീസുകള്‍

നംബിയോയുടെ ഡാറ്റ അനുസരിച്ച്, ഒമാനില്‍ നാലംഗ കുടുംബത്തിന്റെ വാടക ഒഴികെയുള്ള പ്രതിമാസ ചെലവ് ശരാശരി 9,597.6 ദിര്‍ഹം (1,004.7 ഒമാനി റിയാല്‍) ആണ്. ഒറ്റയ്ക്ക് താമസിക്കുന്ന ഒരു വ്യക്തിയുടെ പ്രതിമാസ ചെലവ് ഏകദേശം 2,773.2 ദിര്‍ഹമാണ്. യുഎഇയെ അപേക്ഷിച്ച് ഒമാനിലെ ജീവിതച്ചെലവ് 26.5 ശതമാനം കുറവാണ്. വാടക ശരാശരി 71.7 ശതമാനം കുറവുമാണ്.

ജിസിസി രാജ്യങ്ങളുടെ ജീവിതച്ചെലവ് റാങ്കിംഗ്

ഒമാന്‍
ഏറ്റവും കുറഞ്ഞ ജീവിതച്ചെലവും വാടകയുമാണ് പട്ടികയില്‍ ഒമാനെ ജിസിസി രാജ്യങ്ങളില്‍ ഒന്നാം സ്ഥാനത്തെത്തിച്ചത്. താങ്ങാനാവുന്ന ചെലവില്‍ സന്തുലിതമായ ജീവിതം ആഗ്രഹിക്കുന്ന കുടുംബങ്ങള്‍ക്കും വ്യക്തികള്‍ക്കും ഒമാന്‍ ഒരു മികച്ച തിരഞ്ഞെടുപ്പായിരിക്കും.

ബഹ്‌റൈന്‍
പട്ടികയില്‍ ബഹ്‌റൈനാണ് രണ്ടാം സ്ഥാനത്ത്. ഒരു കുടുംബത്തിന്റെ പ്രതിമാസ ചെലവ് 10,496.8 ദിര്‍ഹമാണ്. ഒറ്റയ്ക്ക് താമസിക്കുന്നവര്‍ക്ക് 2,968.5 ദിര്‍ഹം ആണ് പ്രതിമാസച്ചെലവ്. ദുബൈയുമായി താരതമ്യം ചെയ്യുമ്പോള്‍ ജീവിതച്ചെലവ് 25.3% കുറവും വാടക 65% കുറവുമാണ്.

കുവൈത്ത്
പട്ടികയില്‍ മൂന്നാമതാണ് കുവൈത്ത്. രാജ്യത്തെ ശരാശരി കുടുംബ ചെലവ് 11,105.1 ദിര്‍ഹവും വ്യക്തിഗത ചെലവ് 3,012.5 ദിര്‍ഹവും ആണ്. ദുബൈയെ അപേക്ഷിച്ച് ജീവിതച്ചെലവ് 27% കുറവും വാടക 61% കുറവുമാണ്.

ഖത്തര്‍
പട്ടികയില്‍ നാലാമത് ഖത്തറാണ്. ശരാശരി കുടുംബ ചെലവ് 11,716.9 ദിര്‍ഹവും വ്യക്തിഗത ചെലവ് 3,276.7 ദിര്‍ഹവുമാണ്. ദുബൈയെ അപേക്ഷിച്ച് ജീവിതച്ചെലവ് 20.7% കുറവും വാടക 38.3% കുറവുമാണ്.

സഊദി അറേബ്യ
പട്ടികയില്‍ അഞ്ചാം സ്ഥാനത്താണ് സഊദി. ശരാശരി കുടുംബ ചെലവ് 12,167.9 ദിര്‍ഹവും വ്യക്തിഗത ചെലവ് 3,378.5 ദിര്‍ഹവുമാണ്. ദുബൈയെ അപേക്ഷിച്ച് ജീവിതച്ചെലവ് 19.9% കുറവും വാടക 55.2% കുറവുമാണ്.

യുണൈറ്റഡ് അറബ് എമിറേറ്റ്‌സ്
ജിസിസി രാജ്യങ്ങളില്‍ ഏറ്റവും ജീവിതച്ചെലവേറിയത് യുഎഇ ആണ്. ദുബൈയില്‍ ഒരു കുടുംബത്തിന്റെ പ്രതിമാസ ചെലവ് 14,765 ദിര്‍ഹവും, ഒറ്റയ്ക്ക് താമസിക്കുന്നവര്‍ക്ക് 4,242.5 ദിര്‍ഹവുമാണ്. അബൂദബിയില്‍ കുടുംബ ചെലവ് 12,403.3 ദിര്‍ഹവും വ്യക്തിഗത ചെലവ് 3,550.4 ദിര്‍ഹവുമാണ്. ദുബൈയെ അപേക്ഷിച്ച് അബൂദബിയില്‍ വാടക 34.3% കുറവാണ്. എന്നാല്‍ മറ്റ് ജിസിസി തലസ്ഥാനങ്ങളെ അപേക്ഷിച്ച് അബൂദബിയിലെ ജീവിതച്ചെലവ് ഇപ്പോഴും ഉയര്‍ന്നതാണ്.

ALSO READ: ഒമാനിലെ ലബോറട്ടറിയിലുണ്ടായ വിഷവാതക ചോര്‍ച്ച നിയന്ത്രണവിധേയമാക്കി; അപകടത്തില്‍ ആളപായമില്ല

ഒമാന്റെ പ്രത്യേകതകള്‍

നംബിയോയുടെ 2025ലെ ജീവിതച്ചെലവ് സൂചികയില്‍ ഒമാന്‍ 139 രാജ്യങ്ങളില്‍ 93ാം സ്ഥാനത്താണ്. ജീവിതച്ചെലവ് സൂചിക 39.8 ആണ്. കുവൈത്ത് (40.4), സൗദി അറേബ്യ (41.9), ഖത്തര്‍ (47.5), ബഹ്‌റൈന്‍ (48.3) എന്നിവയാണ് മറ്റ് ജിസിസി രാജ്യങ്ങളുടെ സൂചികയിലെ പോയിന്റ്‌. ഒമാന്റെ കുറഞ്ഞ വാടക, സ്ഥിരമായ ഇന്ധന, വൈദ്യുതി സബ്‌സിഡികള്‍, പ്രാദേശിക ഉല്‍പ്പന്നങ്ങളുടെ ലഭ്യത എന്നിവ ചെലവ് കുറയ്ക്കുന്നതില്‍ നിര്‍ണായക പങ്കുവഹിക്കുന്നു.

According to a recent report, one GCC country has been ranked as having the lowest cost of living in the region. The findings highlight affordability in housing, food, and transportation compared to its Gulf neighbors.