പയ്യന്നൂര്‍: പിലാത്തറ പീരക്കാംതടത്തെ ബീവറേജ് ഔട്ട്‌ലറ്റ് ജനവാസ കേന്ദ്രത്തിന് സമീപത്തേക്ക് മാറ്റുന്നതിനെതിരെ പ്രതിഷേധം ശക്തം. മദ്യവില്‍പ്പനശാല മാറ്റാന്‍ ഉദ്ദേശിക്കുന്ന പുതിയ സ്ഥലത്ത് സ്ത്രീകളും കുട്ടികളുമുള്‍പ്പടെയുള്ളവര്‍ ധര്‍ണ നടത്തി. ഏഴിലോട് കാരാട്ടാണ് ബീവറേജ് മാറ്റി സ്ഥാപിക്കാന്‍ കണ്ടെത്തിയ പുതിയ സ്ഥലം. ഇതിന് മീറ്ററുകള്‍ക്കപ്പുറമാണ് കുഞ്ഞിമംഗലം ഗവ. ഹയര്‍ സെക്കന്‍ഡറി സ്‌കൂളും ആരാധനാലയങ്ങളും സ്ഥിതി ചെയ്യുന്നത്. ഈ സാഹചര്യത്തിലാണ് നാട്ടുകാര്‍ പ്രതിഷേധവുമായി രംഗത്തെത്തിയത്. കഴിഞ്ഞ ദിവസം ഇവിടേക്ക് മദ്യവുമായി എത്തിയ ലോറി നാട്ടുകാര്‍ തടഞ്ഞിരുന്നു. പൊലിസ് എത്തി ലോറി തിരികെ അയക്കുകയായിരുന്നു. തങ്ങളുടെ അറിവോടെയല്ല ഏഴിലോട് കാരാട്ട് ബീവറേജസ് ഔട്ട്‌ലറ്റ് മാറ്റി സ്ഥാപിക്കാനുള്ള നീക്കം നടന്നതെന്ന് ചെറുതാഴം പഞ്ചായത്ത് അധികൃതര്‍ അറിയിച്ചു. പുതിയ സാഹചര്യത്തില്‍ പഞ്ചായത്തില്‍ നടന്ന ചര്‍ച്ചയില്‍ ഔട്ട്‌ലറ്റിനായി സ്ഥലം അനുവദിച്ച കെട്ടിടയുടമ കരാറില്‍ നിന്നു പിന്‍ മാറ്റുന്നതായി അറിയിച്ചിട്ടുണ്ട്. ജനവാസ കേന്ദ്രത്തില്‍ ബീവറേജസ് ഔട്ട്‌ലറ്റ് സ്ഥാപിക്കാനുള്ള നീക്കം അനുവദിക്കില്ലെന്ന് പഞ്ചായത്ത് പ്രസിഡന്റ് പി പ്രഭാവതി പറഞ്ഞു.