കോഴിക്കോട്: വൈദ്യുതി ലൈനില്‍ തട്ടി ആക്രി സാധനങ്ങളുമായി പോയ ചരക്ക് ലോറിക്ക് തീപ്പിടിച്ചുണ്ടായ അപകടത്തിൽ ലോറി പൂര്‍ണമായും കത്തിനശിച്ചു. ഇന്ന് രാത്രി എട്ടോടെ വടകര-തണ്ണീര്‍പ്പന്തല്‍ റോഡില്‍ കുനിങ്ങാടിനും കല്ലേരിക്കും ഇടയില്‍ വൈദ്യര്‍പീടികക്ക് സമീപമാണ് അപകടമുണ്ടായത്.

നാദാപുരം അഗ്‌നിരക്ഷാനിലയത്തില്‍ നിന്നും രണ്ട് യൂണിറ്റ് എത്തിയാണ് തീ അണച്ചത്. സ്റ്റേഷന്‍ ഓഫീസര്‍ എസ് വരുണിന്റെ നേതൃത്വത്തിലായിരുന്നു ഫയർ ഫോഴ്സിന്റെ രക്ഷാപ്രവര്‍ത്തനം. അപകടം ഉണ്ടായ ഉടനെ തന്നെ ഡ്രൈവര്‍ ലോറിയില്‍ നിന്ന് ഇറങ്ങി മാറിയത് ദുരന്തം ഒഴിവാക്കി. ആക്രി സാധനങ്ങളുമായി പട്ടാമ്പിയിലേക്ക് പോകുകയായിരുന്ന വാഹനമാണ് അപകടത്തില്‍പ്പെട്ടത്.

അസിസ്റ്റന്റ് സ്റ്റേഷന്‍ ഓഫീസര്‍ കെഎം ഷമേജ് കുമാര്‍, ഫയര്‍ ആന്‍ഡ് റെസ്‌ക്യൂ ഓഫീസര്‍മാരായ ഡി അജേഷ്, എന്‍എം ലതീഷ്, കെ ഷാഖില്‍, കെകെ ശികിലേഷ്, കെകെ അഭിനന്ദ്, സന്തോഷ് ഇ, ഫയര്‍ ആന്‍ഡ് റെസ്‌ക്യൂ ഓഫീസര്‍ ഡ്രൈവര്‍മാരായ പ്രജീഷ്, ജ്യോതികുമാര്‍ തുടങ്ങിയവർ രക്ഷാപ്രവര്‍ത്തനത്തില്‍ പങ്കാളികളായി.

A lorry transporting inflammable goods caught fire after colliding with a live electric line, resulting in the vehicle being completely gutted.