ന്യൂഡല്‍ഹി: കൊവിഡ് രോഗികളെ പരിചരിക്കുന്ന ഡോക്ടര്‍മാരും നഴ്‌സുമാരുമുള്‍പ്പെടെയുള്ള ആരോഗ്യ പ്രവര്‍ത്തകര്‍ക്ക് വലിയ തോതില്‍ സംരക്ഷണ ഉപകരണങ്ങള്‍ ആവശ്യമാണെന്നിരിക്കെ 90 ടണ്‍ മെഡിക്കല്‍ ഉപകരണങ്ങള്‍ ഇന്ത്യ സെര്‍ബിയയിലേക്ക് കയറ്റുമതി ചെയ്തതായി റിപ്പോര്‍ട്ട്. കൊവിഡ് 19 ബാധിത രാജ്യങ്ങള്‍ക്ക് പിന്തുണ നല്‍കുന്ന യു.എന്‍.ഡി.പിയുടെ (ഐക്യരാഷ്ട്ര വികസന പരിപാടി) സെര്‍ബിയന്‍ വിഭാഗമാണ് ഇക്കാര്യം ട്വീറ്റിലൂടെ അറിയിച്ചത്. അതേസമയം, ഇക്കാര്യം അറിഞ്ഞിട്ടില്ലെന്നാണ് ആരോഗ്യ മന്ത്രാലയത്തിന്റെ പ്രതികരണം. 90 ടണ്‍ മെഡിക്കല്‍ ഉപകരണങ്ങളടങ്ങിയ കാര്‍ഗോ ബോയിങ് 747 ഇന്ത്യയില്‍ നിന്ന് ബെല്‍ഗ്രേഡലേക്ക് വന്നിരിക്കുന്നെന്നും, സെര്‍ബിയന്‍ സര്‍ക്കാര്‍ വാങ്ങിയ ഉപകരണങ്ങളുടെ പണം നല്‍കിയത് യൂറോപ്യന്‍ യൂനിയനാണെന്നും, ഇവ വേഗത്തില്‍ വിതരണം ചെയ്യുമെന്നും യു.എന്‍.ഡി.പി ട്വീറ്റ് ചെയ്തു.90 ടണ്‍ മെഡിക്കല്‍ ഉപകരണങ്ങളില്‍ രോഗികളുമായി അടുത്തിടപഴകുന്നവര്‍ക്ക് ആവശ്യമായ 50 ടണ്‍ സര്‍ജിക്കല്‍ ഗ്ലൗസുകള്‍, മാസ്‌കുകള്‍, കവറുകളും എന്നിവയും ഉണ്ടായിരുന്നു.സംരക്ഷണ ഉപകരണങ്ങളില്ലാതെ ജോലി ചെയ്യുന്നതിനിടെ രോഗികളുമായി സമ്പര്‍ക്കം പുലര്‍ത്തിയതിന് നൂറോളം ഡോക്ടര്‍മാരാണ് നിരീക്ഷണത്തില്‍ കഴിയുന്നത്.