റിയാദ്: കൊവിഡ്-19 വൈറസ് വ്യാപനം തടയുന്നതിന്റെ ഭാഗമായി ജിദ്ദയുടെ വിവിധ താമസ കേന്ദ്രങ്ങളിൽ കർഫ്യു വിപുലപ്പെടുത്തി. വിവിധ താമസ കേന്ദ്രങ്ങളിലാണ് 24 മണിക്കൂർ സമയ കർഫ്യു ഏർപ്പെടുത്തിയത്. വൈറസ് വ്യാപനം നിയന്ത്രിക്കുന്നതിന്റെ ഭാഗമായി സഊദി ആഭ്യന്തര മന്ത്രാലയമാണ് പുതിയ നിയന്ത്രണങ്ങൾ ഏർപ്പെടുത്തിയത്. ജിദ്ദ ഗവര്‍ണറേറ്റിലെ കിലോ 14 ജുനൂബ്, കിലോ 14 ശിമാല്‍‌, അല്‍ മഹ്ജര്‍, ഉലൈല്‍, അല്‍ ഖുര്‍യാത്, കിലോ 13, പെട്രോമിന്‍ എന്നീ മേഖലകളാണ് പൂർണ്ണമായും അടച്ചത്.

     ഇതോടെ ഇവിടെയുള്ളവര്‍ പുറത്തേക്ക് പോകാനോ പുറമെ നിന്നുള്ളവര്‍ക്ക് ഇവിടേക്ക് പ്രവേശിക്കാനോ സാധ്യമല്ല. . ഇന്ന് മൂന്ന് മണി മുതല്‍ ഉത്തരവ് പ്രാബല്യത്തിലായിട്ടുണ്ട്. എന്നാൽ, ഈ മേഖലയിലുള്ളവര്‍ക്ക് ഭക്ഷണം, മരുന്ന് എന്നീ അത്യാവശ്യ ആവശ്യങ്ങള്‍ക്ക് രാവിലെ ആറ് മുതല്‍ വൈകീട്ട് മൂന്ന് വരെ പുറത്തിറങ്ങാമെന്നാണ് അധികൃതർ വ്യക്തമാക്കിയത്. നിയമം ലംഘിച്ചാല്‍ വന്‍ തുകയാണ് പിഴ.