നെട്ടൂര്‍: റെയില്‍വെ ട്രാക്ക് പരിശോധനക്കിടെ കായലില്‍ വിണ് റയില്‍വെ ജീവനക്കാരനെ കാണാതായി. ചേര്‍ത്തല വാരനാട് കരിയില്‍ വിട്ടില്‍ ഹരിദാസിന്റെ മകന്‍ വിവേക്(26) നെയാണ് കാണാതായത്. എറണാകുളം ആലപ്പുഴ തീരദേശ പാതയില്‍ കുമ്പളം അരൂര്‍ പാലത്തില്‍ ശനിയാഴ്ച പുലച്ചെ ഒരു മണിക്കായിരുന്നു അപകടം. വിവേക് മറ്റൊരു ജിവനക്കാരനായ അജേഷിനൊപ്പം ട്രാക്ക് പരിശോധന നടത്തി കുമ്പളംഭാഗത്തേക്ക് വരുന്നതിനിടെയാണ് അപകടത്തില്‍പ്പെട്ടത്.
അരൂര്‍ ഭാഗത്ത് നിന്നും എറണാകുളം ഭാഗത്തേക്ക് വന്ന മെമു ട്രെയിന്‍ വരുന്ന ശബ്ദം കേട്ട് അജേഷ് ഓടി പാളത്തിനരികിലെ സ്റ്റാന്‍ഡില്‍ കയറി. എന്നാല്‍ വിവേകിനോടിയെത്താനായില്ല. പാലത്തിന്റെ കമ്പിയില്‍ തൂങ്ങി കിടന്ന വിവേക് പിടിവിട്ട് കായലിലേക്ക് വിഴുകയായിരുന്നു.
തുടര്‍ന്ന് അരുര്‍ ഫയര്‍ഫോഴ്‌സ്, കോസ്റ്റല്‍ പോലിസ്, പനങ്ങാട് പോലീസ് റയില്‍വെ വിഭാഗം ജീവനക്കാരുമെത്തി പരിശോധന നടത്തിയെങ്കിലും വൈകിട്ട് ഇരുട്ടായതോടെ പരിശോധന തല്‍ക്കാലത്തേക്ക് നിര്‍ത്തിവക്കുകയായിരുന്നു.ഞായറാഴ്ച പരിശോധന പുന:രാരംഭിക്കുമെന്നും അധികൃതര്‍ അറിയിച്ചു.