ന്യൂഡല്‍ഹി: ലോക്കഡൗണ്‍ കാലത്തെ രാജ്യത്തെ ഭക്ഷ്യ വിതരണ രംഗത്തെ പോരായ്മകള്‍ക്കെതിരെ രൂക്ഷ വിമര്‍ശനവുമായി കോണ്‍ഗ്രസ് നേതാവ് പി.ചിദംബരം. രാജ്യത്തെ ദശലക്ഷക്കണക്കിന് വരുന്ന കുടുംബങ്ങള്‍ പണവും ഭക്ഷണവുമില്ലാത്ത അവസ്ഥയിലാണെന്ന് അദ്ദേഹം ചൂണ്ടിക്കാട്ടി. ഭക്ഷണമോ പണമോ ഇല്ലാതെ കുടുംബത്തോടൊപ്പമോ ഒറ്റക്കോ ലോക്ക്ഡൗണില്‍ അകപ്പെടുക എന്നത് ഒരു വ്യക്തിക്ക് സംഭവിക്കാവുന്ന ഏറ്റവും മോശം അവസ്ഥയാണെന്നും അദ്ദേഹം കൂട്ടിച്ചേര്‍ത്തു. ഇന്ത്യന്‍ എക്‌സ്പ്രസിലെ ലേഖനത്തിലാണ് അദ്ദേഹത്തിന്റെ പ്രതികരണം.

രാജ്യത്തെ ധാന്യശേഖരത്തിന്റെ യഥാര്‍ത്ഥ ഉടമകള്‍ ജനങ്ങളാണ്. കേന്ദ്ര സംസ്ഥാന സര്‍ക്കാറുകള്‍ ധരിക്കുന്നത് ഇത് അവര്‍ക്ക് അവകാശപ്പെട്ടതാണെന്നാണ്. എന്നാല്‍ രാജ്യത്തെ കര്‍ഷകരുടേയും കര്‍ഷകത്തൊഴിലാളികളുടേയും അധ്വാനത്തിന്റെ ഫലമാണ്. അത് സംസ്‌ക്കരിക്കുന്നതും സംഭരിക്കുന്നതും ജനങ്ങളുടെ നികുതിപ്പണം കൊണ്ടാണ്. അതുകൊണ്ടുതന്നെ ജനങ്ങളാണ് അതിന്റെ ആദ്യത്തെ അവകാശികള്‍. ഇക്കാര്യം മനസ്സില്‍ സൂക്ഷിച്ചാല്‍ ഒരു സര്‍ക്കാര്‍ ഈ മഹാമാരിക്കാലത്ത് എന്തു ചെയ്യണമെന്നതിന്റെ ഉത്തരം ലഭിക്കും. താഴേത്തട്ടിലെ ജനങ്ങളുടെയെങ്കിലും പട്ടിണി എങ്ങിനെ പരിഹരിക്കാമെന്ന് മനസ്സിലാവും- അദ്ദേഹം പറഞ്ഞു.

ലക്ഷക്കണക്കിന് ജനങ്ങളുടെ കയ്യില്‍ പണമില്ല. അവര്‍ക്ക് ഭക്ഷണം വാങ്ങാനാവില്ല. തങ്ങളുടെ അന്തസ്സില്‍ വിട്ടുവീഴ്ച വരുത്തി സര്‍ക്കാരോ സ്വകാര്യ സംഘങ്ങളോ നല്‍കുന്ന സൗജന്യ ഭക്ഷണത്തിനായി നീണ്ട വരികളില്‍ നില്‍ക്കാന്‍ പാവപ്പെട്ട മനുഷ്യര്‍ നിര്‍ബന്ധിതരാകുന്നെന്നും അദ്ദേഹം കൂട്ടിച്ചേര്‍ത്തു.

പാചകം ചെയ്ത ഭക്ഷണത്തിന്റെ വിതരണം ഒരിക്കലും കുറ്റമറ്റതാകില്ലെന്നും സംസ്ഥാനത്ത് എല്ലാ ഭാഗങ്ങളിലും ഭക്ഷണമെത്തില്ലെന്നും അദ്ദേഹം പറഞ്ഞു. ഗുണ നിലവാരം മോശമായിരിക്കും, അളവ് അപര്യാപ്തമായിരിക്കും. കുടുംബത്തിലെ കുട്ടികള്‍ക്കോ വൃദ്ധര്‍ക്കോ ഭക്ഷണം വാങ്ങിക്കാനായി വരികളില്‍ നില്‍ക്കാന്‍ സാധിക്കില്ല. അവര്‍ക്ക് വേണ്ടികൂടി ഭക്ഷണം വാങ്ങിക്കാനായി യാചിക്കേണ്ട അവസ്ഥ ഉണ്ടാകും അദ്ദേഹം പറഞ്ഞു.

പോഷകാഹാരക്കുറവ് നിലനില്‍ക്കുന്ന ഇന്ത്യയെപ്പോലുള്ളൊരു രാജ്യത്ത്, പ്രത്യേകിച്ച് കുട്ടികള്‍ക്കിടയില്‍, പട്ടിണി വ്യാപകമാകുന്നത് അപകടമുണ്ടാക്കും. പലകുടുംബങ്ങളും പട്ടിണിയിലാണെന്നതിന്റെ തെളിവുകള്‍ ടിവി, പ്രിന്റ്, സോഷ്യല്‍ മീഡിയ എന്നിവയില്‍ ഉണ്ട്.

എത്രപേര്‍ പട്ടിണി മൂലം മരിച്ചുവെന്ന് നമ്മളറിയില്ല, കാരണം ഒരു സംസ്ഥാനസര്‍ക്കാരും പട്ടിണി സമ്മതിക്കുകയോ പട്ടിണി മരണങ്ങളുടെ എണ്ണം കണക്കാക്കുകയോ ചെയ്യില്ല.

ഇന്ത്യയില്‍ കുന്നുകണക്കിന് ഭക്ഷ്യധാന്യവും അത് ജനങ്ങളിലേക്കെത്തിക്കാനുള്ള പൊതു-സ്വകാര്യ സംവിധാനങ്ങളും ഉണ്ട്. എന്നിട്ടും ദശലക്ഷക്കണക്കിന് ആളുകള്‍ ഇന്ത്യയില്‍ പട്ടിണിയിലാണ് എന്നത് വിരോധാഭാസമാണ്- അദ്ദേഹം കൂട്ടിച്ചേര്‍ത്തു.