കൂത്താട്ടുകുളം: കൂത്താട്ടുകുളത്ത് പുകയില മൊത്തവ്യാപാരിയുടെ വീട്ടില്‍ നടന്ന റെയിഡില്‍ 3000 പാക്കറ്റ് നിരോധിത പുകയില ഉല്‍പന്നമായ ഹാന്‍സ് പിടിച്ചെടുത്തു.
കൂത്താട്ടുകുളം ശിവാജി ബീഡി ഉടമയും പുകയില മൊത്ത വ്യാപാരിയുമായ വടകര എടപ്പനാട്ട് റോയി ജോര്‍ജ് (47) ആണ് പിടിയിലായത്. മൂവാറ്റുപുഴ ഡി.വൈ.എസ്.പി കെ.ബിജുമോന്റെ നേതൃത്വത്തിലുള്ള ആന്റീ നാര്‍ക്കോട്ടിക് സെല്‍ സ്‌ക്വാഡാണ് ഇയാളുടെ വടകരയിലെ വീട്ടില്‍ റെയ്ഡ് നടത്തിയത്. ഇതിന് ഹോള്‍സെയില്‍ മാര്‍ക്കറ്റില്‍ രണ്ട് ലക്ഷം രൂപയുടെ വിലമതിക്കും. ഇദ്ദേഹം ഇതിനും മുന്‍പും ഇതേ കാര്യത്തില്‍ പൊലിസ് പിടിയിലായിട്ടുണ്ടെങ്കിലും വീണ്ടും നിര്‍ബാധം അനധികൃത വ്യാപാരം തുടരുകയായിരുന്നു.
ടൗണില്‍ പെട്ടി കടകളില്‍ ഒരു പാക്കറ്റിന് അമ്പതു രൂപ വരെയാണ് വില ഈടാക്കിയിരുന്നത്.ആന്റി നാര്‍ക്കോട്ടിക് സെല്‍ പ്രവര്‍ത്തനം ആരംഭിച്ചിട്ട് ജില്ലയില്‍ ആദ്യമായാണ് നിരോധിത പുകയില ഉല്‍പ്പന്നങ്ങള്‍ പിടികൂടി ഒരാളെ ജയിലില്‍ അയക്കുന്നത്. സ്‌കൂള്‍കോളേജ് കുട്ടികളും ഇതര സംസ്ഥാനക്കാരുമാണ് പ്രധാന ഉപഭോക്താക്കള്‍ മാര്‍ക്കറ്റ് റോഡിലെ മൊത്തവ്യാപാരകടയിലും വീട്ടിലും ഒരേസമയമാണ് റെയിഡ് നടന്നത്.വീടിന്റെ മച്ചിന്റെ മുകളില്‍ ചാക്കില്‍ കെട്ടിസൂക്ഷിച്ചിരിക്കുകയായിരുന്നു ഹാന്‍സ്.
കോട്ടയം മൂവാറ്റുപുഴ എന്നിവിടങ്ങളില്‍ നിന്നാണ് ഇയാള്‍ക്ക് ഹാന്‍സ് എത്തിച്ചിരുന്നതെന്ന് പൊലിസ് പറഞ്ഞു. ഇതോടനുബന്ധിച്ച് മൂവാറ്റുപുഴയിലെ കേന്ദ്രങ്ങളില്‍ റെയിഡ് നടന്നു. ഹാന്‍സ് ഉള്‍പ്പെടെയുള്ള നിരോധിത ലഹരി വസ്തുക്കള്‍ കൂത്താട്ടുകുളം മേഖലയില്‍ വ്യാപാകമായി ലഭിക്കുന്നുണ്ടെന്ന വിവരത്തെതുടര്‍ന്നാണ് റെയിഡ് നടന്നത്.
കൂത്താട്ടുകുളത്തെ മൂന്ന് മൊത്തവ്യാപാരസ്ഥാപനങ്ങളും പൊലീസ് നിരീക്ഷണത്തിലാണ്.കൂത്താട്ടുകുളം എസ്.ഐ ഇ.എസ് സാംസണ്‍, എസ്.ഐ മാരായ യാക്കോബ്, സീനിയര്‍ സിവില്‍ പൊലീസ് ഓഫീസര്‍ എ കെ പ്രകാശ്, വനിതാ പൊലിസ് ഐസിമോള്‍ എന്നിവരാണ് സംഘത്തിലുണ്ടായിരുന്നത്.