തിരുവനന്തപുരം: ബാറുകളില്‍ പാര്‍സല്‍ കൗണ്ടര്‍ അനുവദിക്കാനുള്ള സര്‍ക്കാര്‍ തീരുമാനം ബാര്‍ ഉടമകളും സി.പി.എമ്മുമായുള്ള അവിശുദ്ധബന്ധത്തിന്റെ ഫലമാണെന്ന് പ്രതിപക്ഷ നേതാവ് രമേശ് ചെന്നിത്തല. വലിയ അഴിമതിക്കാണ് ഇത് കളമൊരുക്കുന്നത്. കേന്ദ്രം പറഞ്ഞിട്ടും മദ്യശാലകള്‍ തുറക്കാതിരുന്നത് ബാര്‍ മുതലാളിമാരുമായി ചര്‍ച്ച നടത്തിക്കൊണ്ടിരുന്നതിനാലാണ്. കൊവിഡ് കാലത്ത് മറ്റൊന്നിലും അഭിപ്രായം പറയാതിരുന്ന സി.പി.എം. സെക്രട്ടറിയേറ്റ് മദ്യശാലകള്‍ തല്‍ക്കാലം തുറക്കേണ്ടെന്നു പറഞ്ഞത് ഈ ചര്‍ച്ചക്കു വേണ്ടിയാണ്. ഇപ്പേള്‍ തീരുമാനമായപ്പോഴാണ് മദ്യശാലകള്‍ തുറക്കുമെന്ന് പറഞ്ഞത്. ബാറുകാരുടെ കൈയില്‍നിന്നും പിരിവ് ആരംഭിച്ചുകഴിഞ്ഞു. മദ്യത്തിന്റെ ചില്ലറ വില്‍പ്പന മേഖല, സ്വകാര്യമേഖലയ്ക്ക് തീറെഴുതുന്ന നടപടിയാണിതെന്നും ഈ നയവ്യത്യാസം ഗുരുതര പ്രശ്‌നങ്ങള്‍ സൃഷ്ടിക്കുമെന്നും ചെന്നിത്തല വാര്‍ത്താ സമ്മേളനത്തില്‍ പറഞ്ഞു.