ആഗ്ര: ഉത്തരേന്ത്യയിലുണ്ടായ കനത്ത കാറ്റിലും ഇടിമിന്നലിലും ആഗ്രയിലെ താജ്മഹല്‍ കോംപ്ലക്‌സിലും നാശനഷ്ടം.
പ്രധാന കവാടത്തിനടക്കം കേടുപാടുകള്‍ പറ്റിയെന്നു വ്യക്തമാക്കിയ അധികൃതര്‍, കെട്ടിടത്തിനു തകരാറൊന്നും ഇല്ലെന്നും അറിയിച്ചു.
താജ്മഹല്‍ സമുച്ചയത്തിന്റെ പ്രധാന കവാടത്തിലെ താഴികക്കുടങ്ങള്‍ക്കു താഴെയുള്ള റെയിലിങ് തകര്‍ന്നു. ഇവിടെ കേടുപാടുകളുണ്ടായ ഭാഗങ്ങള്‍ തൊഴിലാളികള്‍ പൂര്‍വസ്ഥിതിയിലാക്കുന്നതിന്റെ ചിത്രങ്ങളും പുറത്തുവന്നിട്ടുണ്ട്.
ഇവിടത്തെ മാര്‍ബിളുകളില്‍ ചിലത് അടര്‍ന്നതായും പ്രധാന കവാടത്തിന്റെ കല്ലുകള്‍ ഇളകിയതായും ആര്‍ക്കിയോളജിക്കല്‍ സര്‍വേ ഓഫ് ഇന്ത്യ അധികൃതര്‍ വ്യക്തമാക്കി.
രാജ്യത്തെ പ്രധാന വിനോദസഞ്ചാര കേന്ദ്രമായ താജ്മഹല്‍ കൊവിഡ് പ്രതിരോധത്തിന്റെ ഭാഗമായി രണ്ടു മാസത്തിലധികമായി അടച്ചിട്ടിരിക്കുകയാണ്.