തിരുവനന്തപുരം: തലസ്ഥാന നഗരം ലഹരി, ഗുണ്ടാ സംഘങ്ങളുടെ പിടിയില്‍. രണ്ടാഴ്ചക്കിടെ മൂന്നു കൊലപാതകങ്ങള്‍ക്കാണു തലസ്ഥാനം സാക്ഷിയായത്. മദ്യലഹരിയിലുള്ള ഗുണ്ടാ പരാക്രമണങ്ങളാണ് മൂന്നു കൊലപാതകങ്ങള്‍ക്കും കാരണമായത്.  കോളനി നിവാസിയും ഓട്ടോ ഡ്രൈവറുമായ കെ.എസ് അനില്‍കുമാറാണ് ഏറ്റവുമൊടുവില്‍ ലഹരിമാഫിയയുടെ കൊലക്കത്തിക്കിരയായത്. സംഭവത്തില്‍ ഒരാളെ പൊലിസ് കസ്റ്റഡിയിലെടുത്തിട്ടുണ്ട്. നിരവധി കേസുകളിലെ പ്രതിയായ ജീവനാണ് അനിലിനെ വെട്ടിയതെന്ന് ദൃക്‌സാക്ഷികള്‍ പൊലിസിനു മൊഴിനല്‍കിയിട്ടുണ്ട്. ഇയാള്‍ ഒളിവിലാണ്. കസ്റ്റഡിയിലുള്ളത് ജീവന്റെ കൂട്ടാളിയാണെന്നാണു വിവരം. ഗൂണ്ടാകുടിപ്പകയാണു കൊലയിലേക്ക് നയിച്ചതെന്നാണു പൊലിസിന്റെ പ്രാഥമിക നിഗമനം. ജീവനെ സിറ്റി പൊലിസ് കമ്മിഷണറുടെ നേതൃത്വത്തില്‍ ആരംഭിച്ച ഓപറേഷന്‍ ബോള്‍ട്ടിന്റെ ഭാഗമായി കസ്റ്റഡിയിലെടുത്ത ശേഷം വിട്ടയച്ചിരുന്നു.  കുപ്രസിദ്ധ ഗുണ്ട ഗുണ്ടുകാട് സാബുവിന്റെ സംഘത്തില്‍പെട്ടയാളാണു ജീവന്‍. ഗുണ്ടുകാട് സാബുവിന്റെ ഏരിയയില്‍ തന്നെയാണ് അനില്‍കുമാറിനെ വെട്ടിക്കൊലപ്പെടുത്തിയതും.
കരമനയില്‍ അനന്തു ഗിരീഷിനെ തട്ടിക്കൊണ്ടുപോയി കൊലപ്പെടുത്തിയതും ശ്രീവരാഹത്ത് ശ്യാമിനെ കുത്തിക്കൊലപ്പെടുത്തിയതുമാണു കഴിഞ്ഞദിവസങ്ങളില്‍ തിരുവനന്തപുരത്തെ നടുക്കിയ മറ്റു രണ്ടു കൊലപാതകങ്ങള്‍.
ആക്രമണങ്ങള്‍ക്കു പിന്നില്‍ ഗുണ്ടകളും ലഹരിമാഫിയാ സംഘങ്ങളുമാണ്. ഇവരെ നിയന്ത്രിക്കാന്‍ ഓപറേഷന്‍ ബോള്‍ട്ടെന്ന പേരില്‍ പ്രത്യേക പരിശോധനകള്‍ നടക്കുന്നതിനിടെയാണു പൊലിസിനെ ഞെട്ടിച്ച് വീണ്ടും ഒരു കൊലപാതകം കൂടി നടന്നിരിക്കുന്നത്.  അതേസമയം തലസ്ഥാനത്ത് മയക്കുമരുന്ന് ഗുണ്ടാസംഘങ്ങളുടെ ഏറ്റുമുട്ടല്‍ തുടര്‍ക്കഥയാകുന്നത് സിറ്റി പൊലിസിനുണ്ടാക്കുന്ന തലവേദന ചെറുതല്ല. പ്രതികളെ ഉടന്‍ പിടികൂടുന്നുണ്ടെങ്കിലും കൊലപാതക സംഭവങ്ങള്‍ക്ക് അറുതിയില്ല.