കൊച്ചി: ഇന്ത്യന്‍ പ്രവാസികളെ നാട്ടിലെത്തിക്കാനായി കൊച്ചിയില്‍നിന്നുള്ള നാവിക സേന പടക്കപ്പല്‍ ഐ.എന്‍.എസ് ശാര്‍ദൂല്‍ ഇറാനില്‍ നിന്ന് യാത്രക്കാരുമായി ഇന്ത്യയിലേക്ക് യാത്രതിരിച്ചു. ബന്ദര്‍ അബ്ബാസ് തുറമുഖത്തുനിന്ന് ഇന്ത്യക്കാരെ ഗുജറാത്തിലെ പോര്‍ബന്ദറില്‍ ആണ് എത്തിക്കുക.  കപ്പല്‍ നാളെ ഇന്ത്യയിലെത്തും. 233 യാത്രക്കാരാണ് കപ്പലിലുള്ള്. ഇറാനിലെ ഇന്ത്യന്‍ എംബസി തയാറാക്കിയ പട്ടിക അനുസരിച്ച് ഇവരുടെ ആരോഗ്യ പരിശോധന നടത്തിയശേഷമാണ് കപ്പലില്‍ പ്രവേശിപ്പിക്കുക. 

ആരോഗ്യ പ്രവര്‍ത്തകര്‍, ഡോക്ടര്‍മാര്‍ എന്നിവരുടെ സേവനത്തിനൊപ്പം മരുന്നുകള്‍, മുഖാവരണം, പി.പി.ഇ കിറ്റുകള്‍ എന്നിവ  കപ്പലില്‍ ഏര്‍പ്പെടുത്തിയിട്ടുണ്ട്. കൂടാതെ, കോവിഡ് 19മായി ബന്ധപ്പെട്ട പ്രവര്‍ത്തനങ്ങളില്‍ ഏര്‍പ്പെടുത്തുന്നവര്‍ക്കായി നാവികസേന തയാറാക്കിയ നൂതന ആരോഗ്യ ഉപകരണങ്ങളും ശാര്‍ദൂലില്‍ സജ്ജമാക്കിയിട്ടുണ്ട്.

പോര്‍ബന്ദറിലേക്കുള്ള സമുദ്ര യാത്രയ്ക്കിടെ യാത്രക്കാര്‍ക്ക് വേണ്ട അടിസ്ഥാന സൗകര്യങ്ങളും ആരോഗ്യ സംവിധാനങ്ങളും കപ്പലില്‍ നല്‍കും. അടിയന്തര സാഹചര്യമുണ്ടായാല്‍ വേണ്ടി വരുന്ന ഐസൊലേഷന്‍ മുറികളും സജ്ജമാക്കിയിട്ടുണ്ട്. 

രോഗ ലക്ഷണമില്ലാത്തവര്‍ക്കും രോഗബാധ ഉണ്ടാവാമെന്ന കോവിഡ് 19 ന്റെ സവിശേഷ സാഹചര്യത്തില്‍ കര്‍ശനമായ സുരക്ഷാ നടപടികളാണ് ഏര്‍പ്പെടുത്തിയിരിക്കുന്നത്. കപ്പല്‍ പോര്‍ബന്ദറിലെത്തിയതിനു ശേഷമുള്ള നടപടിക്രമങ്ങള്‍ ഗുജറാത്ത് സര്‍ക്കാര്‍ നിര്‍വഹിക്കും.