വണ്ടൂര്‍: ജങ്ഷനില്‍ കാറും ലോറിയും കൂട്ടിയിടിച്ചുണ്ടായ അപകടത്തില്‍ എട്ടുപേര്‍ക്ക് പരുക്കേറ്റു. വയനാട്‌നിന്നും വിവാഹാവശ്യത്തിനായി വണ്ടൂരിലെത്തിയ കാറാണ് അപകടത്തില്‍പ്പെട്ടത്. നടുവത്ത് വിവാഹ വീട്ടിലേക്ക് വരികയായിരുന്ന കുടുംബം സഞ്ചരിച്ചിരുന്ന കാറും നിലമ്പൂര്‍ ഭാഗത്ത്‌നിന്ന് പച്ചക്കറികളുമായി വരികയായിരുന്ന ലോറിയുമാണ് കൂട്ടിയിടിച്ചത്.
ലോറി ഡ്രൈവറായ പാലക്കാട് സ്വദേശി കൃഷ്ണമൂര്‍ത്തി (55), കാറിലുണ്ടായിരുന്ന വയനാട് പനമരം സ്വദേശി മുജീബ് (33), ഭാര്യ അനീന (24), മകള്‍ ആയിഷ (4), മുഹമ്മദ് നൗഫല്‍ (28), നൗഫലിന്റെ ഭാര്യ മര്‍ഷീന (26), മക്കളായ അഹമ്മദ് ഇഷാന്‍ (9), അജിലി (2) എന്നിവര്‍ക്കാണ് പരുക്കേറ്റത്. കൃഷ്ണമൂര്‍ത്തിയെ ഒറ്റപ്പാലത്തെ സ്വകാര്യ ആശുപത്രിയിലും മറ്റുള്ളവരെ പെരിന്തല്‍മണ്ണ ഇ.എം.എസ് ആശുപത്രിയിലും പ്രവേശിപ്പിച്ചു.
കൃഷ്ണമൂര്‍ത്തിയുടെയും കാറിലുണ്ടായിരുന്ന കുട്ടികളുടെയും പരുക്കുകള്‍ ഗുരുതരമാണ്. ലോറി ഡ്രൈവറായ കൃഷ്ണമൂര്‍ത്തിയുടെ കാല്‍ ലോറിക്കിടയില്‍ അകപ്പെട്ടിരുന്നതിനാല്‍ ഏറെ നേരത്തെ പരിശ്രമത്തിനൊടുവിലാണ് പുറത്തെടുത്തത്. പൊലിസും അഗ്‌നിശമന സേനയും സ്ഥലത്തെത്തിയിരുന്നു.