വാഷിംഗ്ടണ്‍: എന്‍ജിന്‍ തകരാറിനെ തുടര്‍ന്ന് സൗത്ത് വെസ്റ്റ് എയര്‍ലൈന്‍സിന്റെ ബോയിങ് 737 മാക്‌സ് ഫ്‌ളോറിഡയ്ക്കടുത്ത ഒര്‍ലാന്‍ഡോയില്‍ അടിയന്തിരമായി നിലത്തിറക്കി. യു.എസിന്റെ ഫെഡറല്‍ ഏവിയേഷന്‍ അഡ്മിനിസ്‌ട്രേഷനാണ് ഇക്കാര്യം വെളിപ്പെടുത്തിയത്. ചൊവ്വാഴ്ച ഒര്‍ലാന്‍ഡോ വിമാനത്താവളത്തില്‍നിന്ന് പറന്നുയര്‍ന്ന വിമാനം ഉടനെ സുരക്ഷിതമായി തിരിച്ചിറക്കുകയായിരുന്നു.
മാര്‍ച്ച് 10ന് എത്യോപ്യയില്‍ ബോയിങ്ങിന്റെ ഒരു 737 മാക്‌സ് 8 വിമാനം പറന്നുയര്‍ന്ന ഉടനെ തകര്‍ന്നതിനെ തുടര്‍ന്ന് അമേരിക്കയില്‍ ഈ ശ്രേണിയിലുള്ള വിമാനങ്ങള്‍ക്ക് താല്‍ക്കാലിക വിലക്ക് ഏര്‍പ്പെടുത്തിയിരുന്നു. അതേസമയം യാത്രക്കാരില്ലാതെ വിമാനം ഒരിടത്തേക്ക് പറത്താന്‍ യു.എസില്‍ വിലക്കില്ല.