കണ്ണൂര്‍: കണ്ണൂര്‍ അസി. കലക്ടറായിരുന്ന ആസിഫ് കെ. യൂസഫിന് ഐ.എ.എസ് അക്കാദമിയുടെ റിസര്‍ച്ച് അവാര്‍ഡ്. കണ്ണൂരിലെ കൈത്തറി മേഖലയുടെ വികസനത്തിന് ഓണ്‍ലൈന്‍ വിപണന സാധ്യത ഉപയോഗപ്പെടുത്തി നടപ്പാക്കിയ കാന്‍ലൂം പദ്ധതി സംബന്ധിച്ച പഠനത്തിനാണ് അക്ഷത്ഗുപ്ത മെമ്മോറിയല്‍ പുരസ്‌കാരം ലഭിച്ചത്. 2016 ഐ.എ.എസ് ബാച്ചുകാരായ ട്രെയിനികള്‍ തയാറാക്കിയ 180 ഗവേഷണ പ്രബന്ധങ്ങളില്‍നിന്ന് ഇദ്ദേഹത്തിന്റെ പ്രബന്ധം തെരഞ്ഞെടുക്കപ്പെടുകയായിരുന്നു. അഖിലേന്ത്യാ തലത്തില്‍ രണ്ടാം സ്ഥാനമായ വെള്ളിമെഡലാണ് ആസിഫ് കെ. യൂസഫിന് ലഭിച്ചത്. ഐ.എ.എസ് അക്കാദമിയും ജവഹര്‍ലാല്‍ നെഹ്‌റു സര്‍വകലാശാലയും സംയുക്തമായാണ് ഗവേഷണ പ്രബന്ധങ്ങള്‍ മൂല്യനിര്‍ണയം നടത്തി പുരസ്‌കാരം നിശ്ചയിച്ചത്. ഇപ്പോള്‍ മസൂറിയിലെ ഐ.എ.എസ് അക്കാദമിയില്‍ ട്രെയിനിങ്ങിലാണ് ആസിഫ് കെ. യൂസഫ്.