അമ്പലപ്പുഴ: ക്ഷേത്രം സംരക്ഷിച്ചുകൊണ്ട് ദേശീയപാതവികസനം നടത്തണമെന്നാവശ്യപ്പെട്ട് തോട്ടപ്പള്ളി ശ്രീകുരുട്ടൂര്‍ ഭഗവതിക്ഷേത്ര ഭരണസമിതിയുടെ നേതൃത്വത്തില്‍ നടത്തിവരുന്ന റിലേസത്യാഗ്രവും സമൂഹപ്രാര്‍ഥനയും 10 ദിവസം പിന്നിട്ടു. പാതവികസനത്തിന്റെ ഭാഗമായി ക്ഷേത്രത്തിന്റെ കിഴക്കുഭാഗത്ത് 15 മീറ്റര്‍ വീതിയില്‍ സ്ഥലം വര്‍ഷങ്ങള്‍ക്കുമുന്‍പ് അളന്നുതിട്ടപ്പെടുത്തിയിട്ടുള്ളതാണ്. എന്നാല്‍ ഇതൊഴിവാക്കി ദേശീയപാതയുടെ ഇരുവശത്തുനിന്ന് 7.5 മീറ്റര്‍ വീതം ഏറ്റെടുക്കാനുള്ള നീക്കമാണ് ദേശീയപാതവിഭാഗം നടത്തുന്നത്. പടിഞ്ഞാറുഭാഗത്തുനിന്നും സ്ഥലമെടുത്താല്‍ ക്ഷേത്രത്തിന്റെ ഗോപുരവും കൊടിമരവും പൊളിച്ചുനീക്കേണ്ടിവരുമെന്ന് ക്ഷേത്രം ഭരണസമിതി അംഗങ്ങള്‍ പത്രസമ്മേളനത്തില്‍ ആരോപിച്ചു.
ശക്തമായതിരമാലയില്‍ നിലവിലുള്ള ദേശീയപാതയില്‍പോലും വെള്ളം കയറുന്ന അവസ്ഥയാണ്. വീണ്ടും പടിഞ്ഞാറ്ഭാഗത്തേക്ക് റോഡ് വികസിപ്പിച്ചാല്‍ കോടികള്‍ മുടക്കി നിര്‍മിക്കുന്ന ദേശീയപാതക്ക് യാതൊരു സംരക്ഷണവും ഉണ്ടാവില്ല. ഇത് കണക്കാതെയാണ് ദേശീയപാത വികസന അതോറിറ്റി സര്‍വേനടത്തിയിരിക്കുന്നത്. ദേശീയപാത വികസനത്തിനായി 30 വര്‍ഷംമുമ്പ് ക്ഷേത്രത്തിന്റെ 21 സെന്റ് സ്ഥലം വിട്ടുനല്‍കുകയും ക്ഷേത്രം പൊളിച്ച് നീക്കിയതുമാണ്. വീണ്ടുംപൊളിച്ച് ക്ഷേത്രം നിര്‍മിക്കാന്‍ സ്ഥലമില്ലാത്ത അവസ്ഥയിലാണെന്നും ഭാരവാഹികള്‍ പറഞ്ഞു.