വാഷിങ്ടണ്‍: ലോകത്തില്‍ ഏറ്റവും കൂടുതല്‍ നികുതിയേര്‍പ്പെടുത്തുന്ന രാജ്യങ്ങളിലൊന്നാണ് ഇന്ത്യയെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. യു.എസ് ഉല്‍പന്നങ്ങള്‍ക്ക് 100 ശതമാനം നികുതിയാണ് ഇന്ത്യ ചുമത്തുന്നത്. ഇത് ഉയര്‍ന്ന നികുതിയാണെന്നും ട്രംപ് പറഞ്ഞു. നാഷനല്‍ റിപബ്ലിക്കന്‍ കോണ്‍ഗ്രസ് കമ്മിറ്റിയില്‍ സംസാരിക്കുകയായിരുന്നു അദ്ദേഹം.

നികുതി ഏര്‍പ്പെടുത്തുന്ന രാജ്യങ്ങളിലെ രാജാവാണ് ഇന്ത്യയെന്ന് ട്രംപ് വിമര്‍ശിച്ചു. ഇന്ത്യന്‍ പ്രധാനമന്ത്രി നരേന്ദ്ര മോദി തന്നെ ടെലിഫോണിലൂടെ വിളിച്ചിരുന്നു. ഉയര്‍ന്ന നികുതിയാണ് ഇന്ത്യ ചുമത്തുന്നത്. നമ്മുടെ ചരക്കുകള്‍ക്ക് 100 ശതമാനം നികുതിയാണ് അവര്‍ ഏര്‍പ്പെടുത്തുന്നത്. ഇന്ത്യയില്‍നിന്ന് ഇറക്കുമതി ചെയ്യുന്നതിന് യു.എസ് ഒരു നികുതിയും ഈടാക്കുന്നില്ല.

യു.എസ് ഒരു ഹാര്‍ലി ഡേവിഡ്‌സണ്‍ കയറ്റുമതി ചെയ്യുമ്പോള്‍ ഇന്ത്യ നൂറുശതമാനം നികുതിയേര്‍പ്പെടുത്തുന്നുണ്ടെന്നും ഇത് അംഗീകരിക്കാന്‍ പറ്റില്ലെന്നും ട്രംപ് പറഞ്ഞു.
ഇന്ത്യയുടെ നികുതി സമ്പ്രദായത്തിനെതിരേ ട്രംപ് ഈ വര്‍ഷം ആദ്യത്തിലും രംഗത്തെത്തിയിരുന്നു. എന്നാല്‍ ഹാര്‍ലി ഡേവിഡ്‌സണിന്റെ ഇറക്കുമതി തീരുവ ഇന്ത്യ പകുതിയാക്കിയതോടെ ട്രംപ് സംതൃപ്തി പ്രകടിപ്പിച്ചിരുന്നു.