കോട്ടയം: കെ.ടി.ഡി.സി വാട്ടര്‍ സ്‌കേപ്പ് റിസോര്‍ട്ടില്‍ സമരത്തെ തുടര്‍ന്ന്  കരാര്‍ തൊഴിലാളികള്‍  പക്ഷിസങ്കേതം കാണാനെത്തിയ വിനോദസഞ്ചാരികളെ തടഞ്ഞു.ഇന്നലെ രാവിലെയായിരുന്നു സംഭവം.  തൊഴിലാളികള്‍ തടഞ്ഞതിനെത്തുടര്‍ന്നു ഇവിടെയെത്തിയ നൂറുകണക്കിനു വിനോദസഞ്ചാരികള്‍ പക്ഷിസങ്കേതം കാണാതെ മടങ്ങേണ്ടി വന്നു.
കെ.ടി.ഡി.സി റിസോര്‍ട്ട് പുനരുദ്ധാരണ പ്രവര്‍ത്തനങ്ങള്‍ നടത്താന്‍ ഒരു വര്‍ഷത്തേയ്ക്ക് അടയ്ക്കാന്‍ തീരുമാനിച്ചതിനെതിരെയാണ് സമരം. റിസോര്‍ട്ടിലെ സ്ഥിരം ജീവനക്കാരെ മറ്റു റിസോര്‍ട്ടിലേക്കു മാറ്റിയിരുന്നു. എന്നാല്‍, കരാര്‍ തൊഴിലാളികളുടെ തീരുമാനമായിട്ടില്ല. ഇവരെ മറ്റു റിസോര്‍ട്ടുകളിലേക്കു മാറ്റാമെന്ന തീരുമാനത്തോട് തൊഴിലാളികള്‍ക്ക് വിമുഖതയാണ്. ഇതേത്തുടര്‍ന്നു കഴിഞ്ഞ 20 ദിവസമായി ഇവര്‍ റിസോര്‍ട്ടിനു മുന്നില്‍ സമരം നടത്തിവരുകയാണ്.
സമരം ശക്തമാക്കുന്നതിന്റെ ഭാഗമായി ഇന്നലെ രാവിലെ പക്ഷിസങ്കേതത്തിന്റെ ഗേറ്റ് സമരാനുകൂലികള്‍ അടയ്ക്കുകയായിരുന്നു. വിവിധ സംസ്ഥാനങ്ങളില്‍ നിന്നുള്‍പ്പെടെ സഞ്ചാരികള്‍ എത്തിയപ്പോഴാണു സംഭവം. സി.ഐ.ടി.യു തൊഴിലാളികളാണു സമരം നടത്തുന്നത്.അനുകൂല തീരുമാനമുണ്ടായില്ലെങ്കില്‍ സമരം ശക്തമാക്കാനാണു തൊഴിലാളികളുടെ തീരുമാനം. ഇതോടെ കുമരകത്തെ വിനോദസഞ്ചാര മേഖലക്കു തിരിച്ചടിയാകുമെന്ന്  ആശങ്കയുമുണ്ട്.