പറവൂര്‍: ദേശീയ ജൂനിയര്‍ പുരുഷ- വനിതാ വോളിബോള്‍ ചാംപ്യന്‍ഷിപ്പില്‍ തമിഴ്‌നാടിന്റെ ആണ്‍, പെണ്‍ ടീമുകള്‍ ഫൈനലില്‍ പ്രവേശിച്ചു. കേരള ടീമിനെ തോല്‍പിച്ചാണ് തമിഴ്‌നാട് വനിതകള്‍ ഫൈനലില്‍ ഇടം നേടിയത്. ആദ്യത്തെ ഒരു ഗെയിം കേരള പെണ്‍കുട്ടികള്‍ വിജയിച്ചെങ്കിലും അടുത്ത മൂന്ന് സെറ്റും തുടര്‍ച്ചയായി തമിഴ്‌നാട് നേടുകയായിരുന്നു.
ആദ്യം നടന്ന പുരുഷ സെമി ഫൈനലില്‍ ചണ്ഡീഗഢിനെ തോല്‍പിച്ചാണ് തമിഴ്‌നാട് ടീം ഫൈനലില്‍ പ്രവേശിച്ചത്. ഏകപക്ഷീയമായ വിജയമായിരുന്നു തമിഴ്‌നാടിന്റേത്. ഇന്ന് വൈകിട്ട് നടക്കുന്ന ഫൈനലില്‍ വനിതാ വിഭാഗത്തില്‍ പശ്ചിമ ബംഗാളിനെയാണ് തമിഴ്‌നാട് നേരിടുന്നത്.
കൊച്ചി: വോളിബോള്‍ ഫെഡറേഷന്‍ ഓഫ് ഇന്ത്യയുടെ ആഭിമുഖ്യത്തില്‍ നോര്‍ത്ത് പറവൂര്‍ ബോയ്‌സ് ഹൈസ്‌കൂളില്‍ നടക്കുന്ന 43മത് ദേശീയ ജൂനിയര്‍ വോളിബോള്‍ ചാംപ്യന്‍ഷിപ്പ് ഇന്ന് സമാപിക്കും.വൈകിട്ട് ഏഴിന് നടക്കുന്ന സമാപന സമ്മേളനത്തില്‍ വോളിബോള്‍ ഫെഡറേഷന്‍ ഓഫ് ഇന്ത്യ (വി.എഫ്.ഐ) സെക്രട്ടറി ജനറല്‍ രമാവതാര്‍ സിങ് ജാഖര്‍ സമ്മാനങ്ങള്‍ വിതരണം ചെയ്യും.